Shillong, Nailar 23: Katba ki artylli ki sorkar jylla kata ka sorkar Meghalaya bad Assam ki dang don jingthmu ban don ka jingiapynbeit pud. Ka seng Jaintia National Council Seng kmie ka kwah ban pynsngew ia ka jingai jingmut.
U bah Sambormi Lyngdoh u ba long kum u President ka JNC seng kmie u la ong, ba ki Regional Committee ba la thung da ka sorkar ki dei ban peit da ki history background ka jaitbyndriew pnar haba pynbeit ia u pud u sam.
U la iathuh ruh ba ki pnar naduh ki por hyndai hyntai ki pnar ki la don la ka jong ka riti ka dustur, ka rukom shynshar shnong, shynshar elaka, kaba paw naduh ki por ba dang shynshar u phareng, ki pnar ki la iakhun ia ki thma ban ioh ka jinglaitluid na ka jingshynshar ki phareng, ha kaba u woh Kiang Nongbah u la aiti ka iingim jongu ha u tyllai phasi ka sorkar phareng ha ka snem 1862
U bah Sambormi Lyngdoh u la ong shuh shuh ha ba phai mynta sha ka jingiakajia pud kaba dei hapdeng ka Meghalaya bad Assam ka paw ba ki ba bun ki shnong jong ki pnar ki la leit noh ha ka jylla Assam kynthup kum ka Elaka Labang Nangphyllud kaba hap hapoh ka Block-I.
Kumjuh ruh shibun ki shnong ka elaka Nartiang, hynrei haba phai pat ha ki khana pateng jong ki pnar, ka Elaka Labang Nangphyllud kadei kawei ka ba hap hapoh ka hima 12 elaka ha kaba ka elaka Nartiang la khein ia ka kaba kongsan bad kaba heh bha.
U la ong ruh ba ka jaitbyndriew pnar kadei kaba riewspah habaiadei bad ki khana pateng. Hynrei kumba long mynta lada jia ba kitei ki sah ha Assam, mano ban iada ia ki, kumjuh ruh hato ki lah mo ban pynneh pynsah ia ki.
U la ong ba ka sorkar India ka la ai ia ka aiñ hapoh ka constitution jong ka ri lyngba ka khyrnit 6 lane kaba la tip kum ka Sixth Schedule bad ki district council ba kin long ki nongiada ia ki riti ki dustur ka aiñ shongkha shongman, ha kaba ka sorkar India ha kito ki por ka idonkam ban ai kyrpang ia ka jingiada ia ki ritpaid.
Une u nongialam ka JNC u la ong ba ka JNC ka buh jingkylli.. ba lada kitei ki pnar kin hap ban leit Sha Assam. La kin ioh ne em ia kita ki aiñ ba kyrpang lane kita ki ain ban pynneh pynsah ia la ki jong ki riti ki dustur na ka sorkar Assam. Ha kajuh ka por u la kyntu ruh ba ka dei ban burom ia ka history background ba la don bad ba dei ban pynphai ia ki briew ki ba sah hangtei sha Meghalaya.
