Shillong, Jymmang 15: Ka Khasi Student Union (KSU) West Jaintia Hills mynta ka sngi kala dawa naka sorkar jylla ban pynbeit shwa ia ka jingeh jong ki nongshong shnong ka thain Khanduli ha shuwa ban bteng ia ka jingiakren pynbeit pud bad ka jylla Assam.
Kane ka jingdawa ka la wan hadien ba ki paidbah nong shong shnong ka thain Khanduli West Jaintia Hills ki la shah thombor bad shah khang lynti ban leit sha ki jaka rep ha ki Karbi ka jylla Assam.
Haba kren sha ki lad pathai khubor u president ka KSU West Jaintia Hils u samla Laitphar Syngkrem u la kam ba ka jingiakynad hapdeng ki Khasi-Pnar bad ki jaitbynrew Karbi ka la mih namar ka jingpynieng ka Karbi Anglong Autonomous Council (KAAC) ia ka khyrdop lum khajna hapoh u pud u sam ka jylla Meghalaya.
U samla Laitphar u la ong ba kane ka jingmih ka kyrdop lum khajna bad ka jingshah khang lynti ki nongrep na ka shnong Khanduli ka la wanrah jingeh ia ki paidbah namar ki hap ban siew khajna nalor ba kim ioh ban leit sha ki jaka rep.
Usamla Laitphar u la ong “Hadien ka jingweng noh ia ka khyrdop lum khajna jong ka KAAC ha Khanduli, kam shym la don ka jingiakynad hynrei kynsan kynsan ki briew naka jaitbynriew Karbi kila wiang ding iaka ingtrep bad kila khang lynti syndon iaki Khasi-Pnar ban leit sha ki jaka rep watla ki jaka rep ki dang hap ha u pud u sam ka Meghalaya”
U samla Laitphar ula ban ba na ka liang ka KSU bad ki paidbah ka thain khappud ki dawa ba ka sorkar Meghalaya ka dei shim khia ia kane ka jingshah pyndik ki Khasi-Pnar kiba don hapoh ka shnong Khanduli West Jaintia hills namar kane ka jingshah pyndik ki paradoh parasnam ka dang bteng haduh kine ki sngi.
U la ong ba na ka liang ka seng ka la iakynduh ia ki bor district ka West Jaintia hills bad Karbi Anglong hynrei haduh mynta, ka jingshah pndik ki Khasi-Pnar ka dang iai bteng.
Nalor ka sorkar Assam, ka KSU ka dawa ruh na ka Jaintia Hills Autonomous District Council (JHADC) ban shim khia ia kane da ka ba ka dei ban iakren bad ka sorkar Assam bad ka KAAC, khnang ba ki nongrep na ka shnong Khanduli ki lait na ka jingshah pyndik, la ong u President ka KSU ka West Jaintia Hills District.
