Shillong, Naitung 31: Ka KSU South West Khasi Hills District ka la kynnoh ba ka kong Isawanda Laloo, DC jongka South West Khasi Hills District ka dei naka nongiada jongka Atomic Minerals Directorate. Ka seng ka pyrshah jur halor ka jingkren jong ka Deputy Commissioner haka por ba ka ong ba ka AMD ka khlem pan permission naka da kaba ong ruh ba “katba kum ka jingong jongki ki lah ban wad marpohkhyndew ha baroh ki bynta jongka RI lada la mynjur ki trai khyndew”.
Kane ka pyni ba ka Deputy Commissioner jong ka South West Khasi Hills District ka dei ka nongshah liang bad ngi kwah ba kan pynshai paitbah ba ha Kano ka nongrim maka kum ka Nongialam District kan kren ia ka bynta ba dei ban kren ka AMD lem Kumta ai ki paitbah jongka South West Khasi Hills District ki bishar ia kiba kum kine Ki jingkren kiba la pynlamwir iaki paitbah jongka District baroh kawei halor ka issue uranium bad bishar ruh ba phi trei na bynta jongno.
Ka seng ka kwah buh ruh iaka jingkylli ba naduh mynno ka AMD ka la buh iaka DC ban long ka Nongaiktien halor kane ka issue bad nga sngew ba ka dei ban Pynshai paitbah khnang ba ngin sngewthuh ia Kiei Kiei baroh. Kane ka jingkren jongka Deputy Commissioner ka dei ka jingkren laplah bad ka KSU ka kwah ban buh jingkylli ba Kumno Kat ka DC kam tip iaka bynta jong ka Sorkar bad ka District Council halor ka kam ksam Uranium.
Ka Seng ka kwah ban pynshai ruh ba ha ka jingshisha ka sorkar Meghalaya ha u bnai August jong ka snem 2016 ka la dep pyndam noh iaka jingaiwai iaka khyndew ba 422 hectares sha ka UCIL na bynta ka Uranium Mining bad Ki Pre-uranium mining activities ia kaba ka sorkar ka la aiwai naduh ka 24. August jong u snem 2009 nangta ka KSU Sengkmie haka 05. April 2018 haka jingiakynduh bad ka Sorkar u Chief Minister Conrad Sangma ruh ula kular haka seng ban nym mushlia halor u uranium.
Shuh shuh, ka KHADC ka la phah ruh daka jingthoh sha ka seng ban pyntip ba ka la Dep weng noh iaka NOC tih uranium naduh ka 22. February 2017. Ka jingkylli pat ka long hato khlain bor ka DC jong ka South West Khasi Hills District ne khlain bor ki rai jong ka KHADC bad ka Sorkar halor u uranium namar kumba ka paw lyngba ki lad pathai khubor imat ka DC ka shu long niangkohnguh beit ia kat ba ong ki officers jong ka AMD.
Ka seng KSU ka ong hato lane ka don ka jing ia sylla ia sngewthuh jingmut napoh napoh hapdeng ka DC bad ka UCIL ne AMD, bad kumjuh ban leh lyndet noh ruh iaki rai jongka District Council bad ka Sorkar. Ka KSU ka dawa na iaka sorkar ba ka dei ban pynshitom halor ka jingiaid lait naki rai jongka.
Kane ka rukom long rukom man kan ialam Jngai bha ha baroh ki liang bad ka jing kulmar jingmut ha kiba bun ki bynta, hynrei ban kdup ia kita kiba mut ban pynjot ia ka district hi baroh kawei lyngba ka bih uranium ngi sngew ban ong ba kiba don kti ban ia sylla kin shim iaka jingkitkhlieh la ong u samla Jiedskhem Nongsiej, General Secretary ka KSU South West Khasi Hills District ha ka kyrwoh mynta ka sngi.
