Shillong, Risaw 03: Ki phra ngut ki MDC barim jong ka Khasi Hills Autonomous District Council kiba la shah pynduh bai bam tymmen, mynta ka sngi kila ai khublei kyrpang ia u Chief Executive Member ka Council u Bah Pyniaid Sing Syiem uba la shim khia na ka bynta ban pynioh biang ia ka bai bam tymmen kumba la bthah da ka ïing Khashari.
Kine ki kynhun MDC barim kia ioh bai bam tymmen ki kynthup ia u Bah Handle Mukhim u MDC barim ka Sohryngkham, u Bah Sounderstrong Cajee u MDC na Mylliem, u Bah HF Marngar u MDC na Parïong, u Bah HN Diengngan u MDC na Nongstoin, u Bah Phrang S Warjri u MDC na Nongthymmai, u Bah JG Rynniaw u MDC na Mawshyrut bad u Bah Edar Nongbri u MDC na Nongkrem.
Haba ïa kren bad ki lad pathai khubor u Bah Handle Mukhim ua dei u MDC barim ka Sohryngkham u la ong ba ha u snem 2002 ha ka por ba ki dang long ki MDC kila wanrah ia ka Bill halor ka bai bam tymmen bad la ioh ruh ka jingmynjur na u Lat ka jylla ha u snem 2006.
Shuh shuh u Bah Handle u la iathuh ba naduh u snem 2006 sha neng ym shym la ioh shuh ia ka bam bam tymmen bad kaba la pynlong ruh ia kane ka kynhun ki MDC ba kin leit tieh jingkhang sha ïing Khashari bad hadien kane na ka liang ka Khashari kala bthah ia ka District Council ban siew bai bam tymmen.
U Bah Handle u la iathuh ruh ba ka jingduh biang ia ka bai bam tymmen naduh u snem 2009 haduh 2012 kadei namar ba kam shem la don ka provision hapoh ka mang tyngka jong ka council bad u la pyntip ruh ba ki MLA kiba dei ruh ki MDC halor ka bai bam tymmen ki hap ban jied tang kawei ba ki kwah ban shim ia ka bai bai.
Halor ka jingshim khia u Chief Executive Member ka KHADC u Bah Pyniaid ban pynioh biang ia ka bai bam tymmen ka jong ki, na ka liang jong ka kynhun ki MDC kila ai khublei kyrpang.
Ha kawei pat ka liang na ka liang u MDC barim jong ka Mylliem u Bah Sounder Strong Cajee u la pynpaw ba ka jingioh bai bam tymmen jong ki kynhun MDC barim kiba don mynta phra ngut kadei ka jingiarap ka ïing Khashari bad u la ai khublei ruh ia u Bah Pyniaid Sing Syiem uba la shim khia tang hapoh ar bnai u la lah ban pynioh bai bam.
