Shillong, Iaiong 08: U Bah John F Kharshiing ar sngi ha dien ba u la mih noh na ka party Congress mynta ka sngi u la pynbna paidbah ba un ai ka jingkyrshah ia u Dr Jemino Mawthoh kyrtong MP jong ka UDP ia kaba la kyrshan lang da ka kynhun MDA, ia kane u la pynbha ha ka jingiakren bad ki lad pathai khubor ha ophis jong ka NPP.
Haba kren ha ki ladpathai khubor mynta ka sngi u Bah John u la ong ba u ai khublei bad kitbok ia baroh ki nongialam jong ka Meghalaya Democratic Alliance (MDA), Shri. Conrad K Sangma, CM, Dr Donkupar Roy, Speaker, Shri. Prestone Tynsong, Dy CM, Dr DD Lapang, Dr W Kharlukhi, Shri. Ivanlum Marbaniang, Shri. KP Pangniang, kynthup ka National Peoples Party(NPP), ka United Democratic Party(UDP), ka Peoples Democratic Front(PDF), ka Hill State Peoples Democratic Party(HSPDP), bad ki Independent kiba la sngap ia ka jing angnud jong ki paidbah ban ioh ia ka jingkylla hapoh jylla Meghalaya ha kaba ki la lah ban ia mynjur lang ia u kyrtong mon lang ha ka kyrteng jong u Dr Jemino Mawthoh, MLA barim bad ka Agatha Sangma, MP bad MLA barim.
Na ka liang jong u Bah John u khot u wer ia baroh ki paralok na jngai bad na jan ban ai mynsiem ia kane ka jingkhot ban ioh ia ka jingkylla kaba thymmai lyngba ka jingiatylli lang kawei ka NPP, UDP, PDF, HSPDP, Independent, ha uwei u kyrtong u Dr Jemino Mawthoh, na ka bynta ka Lok Sabha Election na ka 1-Shillong Parliamentary Constituency, uba la lah ban ioh ia ka jingieid ym tang na ka bynta ka jinglah ka jingtrei shitom ka jong u hynrei khamtam ba u la lah ban long mynta ka jingkyrmen ia ki hajar ngut ki samla ka jylla Meghalaya, bad u pynpaw ka jingsngew burom ia kane ka jinglah ka jong u Dr Jemino Mawthoh ban poi ha kat kane ka burom ban long u kyrtong mon lang jong baroh saw tylli ki seng.
Kane ka dei shisha ka election MP kaban sah kynmaw bad nga mih khnang ha kum kane ka por namar nga ruh nga iohi ia ka jingangnud jong ki paidbah ban wanrah ia ka jingkylla na ka bynta ki paid Khasi, Jaintia bad Garo ka jylla Meghalaya. U ngeit skhem ba ka India kan sa hap ban sngap ia ki jingud jong ngi lada ngi ia tylli bad nga ngeit ba u Dr Jemino Mawthoh, u don ka juh thong.
Ka jylla mynta ka don ha ka lynti ban ioh ban nang kiew shaphrang bad ia kane ngi sakhi lyngba ka jinglah ka jingtyrwa jong ki saw tylli ki seng riewlum kiba la buh sha rud ia ka jingsngew liang ban sngap ia ka sur uba bun ba lang ban sei tang uwei u kyrtong. Haba la mih kum kane ka rai to ai ba ma ngi ki paidbah Meghalaya ngin shim khia ban mih shakhmat sha kane ka jingangnud ban ioh ia ka jingkylla da kaba kyrshan ia ki kyrtong mon lang ka kynhun MDA, ha kane ka election.
U Dr Jemino Mawthoh, MLA, barim, u nonghikai, uwei na ki nong prat lynti ia ki kam Seng Samla Shnong, ha ka jingshem jong nga nga shem ba u long uba tbit tam napdeng kine ki kyrtong kiba mih mynta ka kynti ban long u nongmihkhmat na ka 1-Shillong Parliamentary Constituency.
U Bah John u la ong ba u ngiet skhem ba kane ka jingtrei lang jong baroh kan plie ia ki lad ki lynti ban pynbeit ia kiba bun ki jingeh kiba ma ngi kum ka jaidbynriew ngi ia kynduh bad tyngkhuh lyngba ki Ain kiba bun rukom, Sa shisien nga khot lang ia baroh wat nym duh jingkyrmen shaniah ha ka jingstad u paidbah bad ka jingkhraw jong ka India namar ka jingiatylli ka dei ka jingjop bad ban shon ia ka shap jong phi ha ka shap jong ka BOM (UDP) na ka bynta u Dr Jemino Mawthoh na ka 1- Shillong Parliamentary Constituency bad ha ka shap jong ka KOT (NPP)na ka bynta ka Ms Agatha Sangma, na ka bynta ka 2-Tura Parliamentary Constituency kiba long baroh ar ki kyrtong mon lang jong ka kynhun MDA.
