Shillong, Nailar 18: U Myntri rangbah ka jylla u Cornad K Sangma mynta ka sngi u la ia kynduh ia ki rangbah shnong bad ki seng bhalang na Mawlai kiba la wan ai ia ka dorkhas ia kaei kaba kila rai ha ka jingialang kaba kila long ha pdeng jong ki ha ka 17/8/2021.
Ki mat kiba kila thoh ha ka dorkhas ki long, ba ka sorkar ka dei ban weng kam noh ia kito ki pulit kiba don kti ha kaba siat briew ha ka 13/8/2021, ban nym buh pulit ia mynta ha katei ka thain, ban pynioh biang ia ka internet,ban weng ia ka korphiew bad ban pynkynriah ia ki pulit CrPF na Mawlai.
Halor kitei ki mat kiba la kdew haneng bun na kiba wan sha ka jingiakren kila kren bniah bad ka sorkar kala shim jignthoh ia ki baroh,ha kane ka jingiakynduh la pyntip sha ki ba ia ka korphiew la weng da ki kynta mynta ka sngi bad ka Internet kan long naduh 6.00 baje mynta ka sngi.
Haba ia dei bad ki ktem jong ki pulit CrPF kiba don ha Mawlai ki dei kiba la buh tang shipor hynrei kila don ha kitei ki jaka la bun bun snem mynta ka sorkar kala shim ia ki lat ki lynti ban weng ia ki na katei ka thain kala sdang bad ki CrPF ki kwah ban mih bad ha ka juh ka por hap shna ia ka jaka na ka bynta jong ki.
Haba ia dei bad ka jingdawa ban weng kam ia kito kiba don kti ha kane ka jingiakynduh la pyntip ha kane ka jingialang ba ka sorkar kala thung ia ka Judicial Inquiry bad kane ka kynhun tohkti kan sa peit ha ka rukom kaba bniah halor kane ka jingjia haba ia dei bad kane la bthah ia u nongbishar Justice T. Vaiphei ban khlieh ia kane ka kynhun tohkit.
U Myntri rangbah ka jylla u la ong ba u Justice Waiphei nalor ba u dei u shongknor ka Meghalaya Human Right Commission ban peit na ka liang jong ka hok long briew man briew bad ha ka juh ka por la ai ka kti kaba laitluid ban tohkit halor kane ka jingjia.
Ha kane ka jingiakynduh la pyntip sha ki ba ha dien ba la ioh ia ka kaiphot bad kila ioh ia ki jingtip kiba bniah dei tang hangta yn sa lap mano ba don kti ha kane ka jingjia dei hadien kata ba ka sorkar kan sa lah ban shim ia ka rai kumno ban leh pyrshah ia kiba don kti, la dei ban weng kam ia ki lane ha kano ka rukom hap ban pynshitom ia ki kane kan long tang ynda la ioh ia ka kaiphot.
Ha kane ka jingiakren la ia kren ba ha ki por kiba ban sa wan la dei ban pynlong ia kano kano ka jingkhynra dei ban leh da ka jingtip ki dorbar shnong bad na ka liang jong ka sorkar kala kyrpad ia ki paidbah ban ia treilang bad ka sorkar ban wanrah ia ka jinghsong suk.
Ha kane ka jingialang na ka liang jong ka sorkar kala kren ruh halor ka jingshah kawang maw jong ki kali pailot jong u lat ka jylla ha kaba kawei na ki kali kala julor, la kyntu ia baroh ba kin pynthikna ba kan don ka jingshong suk.
U Myntri rangbah ka jylla u la kyrpad biang ba pyuntip sha ki bor sorkar ban ioh biang ia ki suloi kiba la shah knieh na ki pulit bad kaba kong san ka long ba ka sorkar ka kwah ban ioh biang ia ki ktah suloi.
