Ha ka High Level Task Force pynleit jingmut ki MR ka NE halor ka kam jngohkai pyrthei

Shillong, Iaiong 07: U Myntri Rangbah ka jylla u Conrad K. Sangma mynta ka sngi u la pyniaid ia ka jingialang jong ka first High Level Task Force meeting halor ka tnad kam jngohkai pyrthei ia kaba la don lang ruh da ka DoNER Minister ka Jyotiraditya Scindia, u Myntri Rangbah ka Sikkim u Prem Singh Tamang, u Myntri Rangbah ka Tripura u Dr. Manik Saha bad ki heh ophisar jong ka sorkar kmie bad sorkar jylla.
Ha kane ka jingialang la iakren ia ka rukom treikam ka ban plie lad ia ka kam jngohkai pyrthei ha ka thain shatei lam mihngi ka ri India.
U Myntri Rangbah ka Jylla Conrad K. Sangma u la kynthoh ba ki nongwan jngohkai pyrthei na kiwei pat ki bynta jong ka ri India bad na ka pyrthei baroh kawei ki ithuh ia ka thain North East kum “kawei” bad ka long kaba donkam ba ki jylla kin iatrei lang ban pynsuk ia ka kam jngohkai pyrthei.
U Conrad u la ai khublei ïa ka Myntri DoNER kaba la shim ïa ka sienjam ban thaw ïa ka kynhun treikam, kaba u myntri rangbah u la khot kum ka jingïarap “ba pawnam” ban kyntiew ïa ka kam jngohkai pyrthei ha ka thaiñ shatei lammihngi baroh kawei.
Haba kren ha katei ka jingialang, ka Myntri ka tnad DoNER ka Scindia ka la ong, “Ka thain ka lah ban pyndonkam ia ka jingriewspah bad ka jingitynnad ka mariang ban pyniaid ia ka roi ka par kaba neh, ban kyntiew ia ka ioh ka kot ha ka thain bad ban pynmih kam thaw jam”.
Ka Task Force ba la thaw da ka tnad DoNER bad la khlieh da u Myntri Rangbah ka jylla Meghalaya kan peit bniah ia ka jinglah ban khring ka kam jngohkai pyrthei ha kane ka thain, kan ithuh ia ki jingduna ba kongsan bad kan ai jingmut ia ka lynti iaid na ka bynta ka jingpynroi ba pura ia ka tnad jngohkai pyrthei ha ka thain.