Shillong, Jylliew 01: Ka jingklumar kaba la jia ha ka meit sngi palei ha Motphran kala long kaba khluid bah hadpeng ki bor pulit bad ki paidbah ha kaba ki pulit kila khang lang lad ia ki paidbah ba kin nym ioh ban tur sha pdeng jong ka Motphran.
Na ka liang jong ki pulit kila pyndon kam da kaba siat ia ki tear gas ban pynpra ia ki paidbah kiba la khih bitar na ka hamsaia ia kaei kaba la jia ha ka por mynsngi ha jan Bimola Point ha kaba la mih biang ka huri hura ha ka por miet ha katei ka juh ka jaka.
Ha kane jingiakynad ha pdeng ki pulit kiba pahara ha Motphran bad ki paidbah ka la mih ia ka jingiather maw kaba la jur bha bad ha kane ka jingjia kawei ka kali kamai sorkar SPTS kaba don ia u number ML01-6575 kala sha pynkhyllem ha jaka ieng Taxi Jaiaw ha Motphran.
Mynta ka sngi na ka liang jong ki bor jong ka district administration kila pynkhlain ia ki bor pahara jongki pulit kyrpang ha ki thain Motphran ban peit ba kan nym mih shuh kano kano ka jingiakynad ha kane ka thain ha kaba la buh lang ruh ia ki magistrate ba kin don lang.
