Shillong, Lber 24: Ka dorbar ba kyrpang kaba la khot mynta ka sngi hapoh ka iing dorbar jong ka Khasi Hills Autonomous District Council ban ia tynjuh bor pyrshah ia ka Executive Committee kaba la ialam da u Bah Latiplang Kharkongor.
Ia ka mat bym don jingshaniah shuh ia ka Executive Committee kaba la ialam da u Bah Latiplang la wanrah da u bah Pyniaid Sing Syiem. Ha ka jingkren u Bah Pyniaid u la kam ba kila don 20 ngut ha ka kynhun UDA bad ka jingwanrah ia kane ka mat bymdon jingshaniah shuh ia ka EC jong u Bah Latiplang ka long ba kam don shuh ia ka jingbun paid.
La ong ba ha kine ki saw bnai kila don shibun ki jingdkoh haka jingtreikam jong ka EC bad khamtam eh ban wanrah ia ka mang tyngka jong ka KHADC ha kaba ki nongtrei ki don kumba 800 ngut, kumta ki kwah ban ioh noh ia ka dorbar mang tyngka.
Haka jingkren jong u bah Teinwell Dkhar, u la ong ba kane ka mat bym don jingshaniah shuh ia ka EC ka long ba kam don ia ka jingbun paid ka EC jong u Bah Latiplang Kharkongor dei halor kane ka nongrim ba u Lat ka jylla u la pynjari ia ka Administrative Rule hapoh jong ka KHADC.
U Bah Roni V Lyngdoh, haba kren hapoh ka iing dorbar u la ong ba lada khlem pynjari ia ka AR, ka dorbar mang tyngka la dep ban long ha ka 17 tarik mynta u bnai bad kan nym don kane ka jingiakynduh mynta ka sngi. U la ong ba lada jia ei ei ia ki briew kiba don ha kane ka dorbar mynta ka sngi mano ban kit khlieh.
U la ong ba kam pat juh don hapoh ka khana parom jong ka KHADC ba ia ka rai ka jong u Lat ka jylla hap rah sha iing bishar, la kynnoh ba lada kynriah ki dkhot sha ka ba don ka liang synshar kam don AR lada kynriah sha ka liang byn don sorkar ka don AR, la kdew ia kaei ba la jia ha GHADC.
Ha ba ia shim bynta ha kane ka jingiatainia, u bah Titosstarwell Chyne ula ong ba kane ka jia namar ba kam don ka ain ban tehlakam ia ka jingiarung ia mih ki dkhot bad ha ka sain pyrthei don kiba shim kabu namar ka dei ka synshar paidbah ka don kam ia ka jingdon bun paid.
Ha ka jingkren u bah Lamphrang Blah, u la ong ba ka long kaei kaei kaba sngewsih ba la leh khlem da bud ia ki rule, u la ong ba kum kine ki jingjia kila juh jia mynshuwa ruh hynrei kam pat juh long pat kum mynta ka sngi namar ka dei ka jinglehbor na ka sorkar.
Ha ka jingkren u bah Gabriel Wahlang, u la ai burom ia u Bah Latiplang bad ia u Lamphang ka iing dorbar kiba la lah ban pynneh pynsah ia ka jinglong laitluid jong ka District Council, namar ka sorkar kam shym la ithuh ia ka EC, hynrei mynta ka sngi ba pynkhyllem ia ka EC pat kala ithuh kane ka dei ka jingjop.
U bah Banjop Pyngrope ha ka jingkren jong u u la ong ba ki briew kiba bat ia ka bor synshar kila pynkhien ia ka rule ki ain namar tang ka EC kam pat ioh pyntreikam la pynjari iaka AR, dei u lat ka jylla u bah ong ba kiba pyrshah ia ka CAA ki dei ban leit sha North Korea, u la ong ba dei u Lat u ba la leh don bor mynta u hap ban leit sha North Korea.
Haba jubab ia ki jingkren jong baroh ki dkhot hapoh ka iing dorbar na ka liang jong u Bah Latiplang Kharkongor CEM jong ka KHADC u la ong ba naduh ka sngi ba u shah jied kum u CEM hapoh ka iing dorbar u khlem ioh ban trei kam, namar ka KHADC kala long kum ka jaka ialeh khun jakai.
U la ong ba lada u don ha ka shuki ne um don ha ka shuki yn trei naka bynta ki paidbah, dei na ka jingleh ka sorkar kaba la pynbor ia ki ba kin hap ban leit sha iing bishar ban ioh ia ka jingiada.
Haba la ioh ia ka jingkren na baroh ar liang, u Bah Pynshngian u la buh ka jingkylli ia u Bah Pyniaid hato yn weng ne em ia kane ka mat bym don jingshniah shuh, na ka liang jong u bah Pyniad u la ong ba un nym weng.
Na ka liang jong u Lamphang u la shim ia ka rai ban shuh pynlong noh ia ka jingrah kti bad ha kane ka jingiarah kti ka liang jong ka kynhun UDA kala ioh 20 ngut bad na ka liang jong u Lamphang u la pynbna ba ka EC jong u bah Latiplang ka la khyllem.
