Shillong, Nailur 25: U Myntri ba dei peit ia ka tnad Disaster u bah Kyrmen Shylla mynta ka sngi u la iathuh ba ha kane ka jinglynshop jong ka mariang kala wan rah ia ka jingduh bun ki jong ki mynsiem briew.
Haba kren ha ki Lat Pathai khubor mynta ka sngi u la ong ba ka jingduh ki mynsiem briew ha kine ki saw sngi na ka daw jong ka jingjur jong u slap ka long 12 ngut, kiba dang jah 5 ngut bad kiba mynsaw ki long 4 ngut, kine ki long tang kiba la ioh jingtip.
La iathuh ba tang mynta ka sngi na ka daw jong ka jingtwa khyndew bad shah rong ha ka um 5 tylli ki mynsiem kila duh ei iala ka jingim, kiba dang jah khlem pat lap ia ka met jong ki ki long san, lai tylli ha Lower Lumparing, wei ha Wahumkhrah.
La iathuh ba mynta ka sngi ha kane ka nongbah Shillong kila don ar tylli ki jingtwa khyndew kawei ha Madanriting ha kaba iwei i khunlyng ia la khlad, kawei ba mynsaw, ha Lower Lumparing ar ngut kila khlad bad lai ngut ki dang jah.
La iathuh ba ha ka jingshah rong jong kawei ka Jeep ha wah Tihiang ha thain Warsan Lyngdoh jong ka South West Khasi Hills District, 6 ngut ki mynsiem briew kila duh ei bad haduh mynta ka sngi la ioh ban sei san tylli ki met.
Ha Nongstoin kawei ka kali Alto kala shahrong ha ka um, ar ngut kila khlad, kawei ka dang jah bad 3 ngut kiwei pat ki la lait im, kiba mynsaw ki long saw ngut, kawei ha Madanriting bad lai ngut ha Mawlai Umthlong.
Haba ia dei bad ka jingiarap na ka liang jong u Myntri u la ong ba ki hap ban peit ia ki kyndon jong ka SDRF bad lada ka rule ka shah ka sorkar kan ai jingiarap, ha ka juh ka por u phah ka khubor sngewlem sha kiba ha iing ha sem halor kane ka jingjia ba sngewsih ba u trai kynrad nongbuh nongthaw u ai ka jingpyntngen.
