Shillong, Nailur 13: U myntri ba dei peit ia ka tnad bording jong ka sorkar jylla u James K Sangma haba jubab ia ka mat jingiakren hapoh ka iing dorbar ia kaba la wanrah da ka Miani D Shirang jong ka seng Congress ha kaba ia dei bad ka jingpyntrei kam ia ka skhim “Saubhagya” ban pynioh bording ilestrik sha baroh ki shnong, u la ong ha kaba pyntrei kam ia ka skhim ‘Suabhagya” kam sdon kata ka jingbamsap.
U myntri ba dei peit ia ka tnad bording u la iathuh ba ka jinglut baroh ha kaba pyntrei ia kane ka skhim ban pynioh bording sha baroh ki shnong ka long T.657.75 klur bad ha kine ki hynriew bnai la lah ban pynioh bor ding sha ki 500 tylli ki shnong ha ka jylla baroh kawei.
Haba ia dei bad ka jingpynlut, la ong ba n aka T.657.75 klur tyngka, ka sorkar pdeng ka la pynlait iaka pisa T.291.81 klur bad kaba dang sah mynta kaba ka sorkar kam pat ioh ka long T.365.24 klur.
Halor ka jingkren jong ka Miani ba don ei ei sha lyndet ha kaba ia dei bad ka tender kaba la khot, na ka liang jong myntri u la ong ba wat kala bor ka dei ha ka sorkar jylla ban khot hynrei ka sorkar jylla ka hap ban bud ia ki kyndon kiba la buh da ka Rural Electrical Corporation (REC) jong ka sorkar pdeng bad ia ka jingtrei kin lah ban pyn pyndepha ka por kaba biang.
Haba ia dei bad ka jingsiew ia ki Bill, na ka liang jong u myntri u la ong ba ka don ar bynta, kawei kaba thied ia ki tiar bad kawei pat kaba pyntrei ia ka kam, ka jingpynkloi ia ka jingsiew ka long ban ia beh ia ka por ba la buh, u myntri u la ong haba kitiar kila poi balei ban pynslem ia ka jingsiew.
Halor ka jingkynnoh jong u Dr Mukul Sangma nongialam ka pyrshah pyrshah ba ka don kata ka jingiabamsap kaba jur bha ha kaba pyntrei kamia ka skhim “Suabhagya” na ka liang jong u myntri u la ong ba u sngewlyngoh ban ioh sngew ia kine ki rukom kren na u Dr Mukul kaba u niew burom, ban shu kynnoh ka long kaba suk bad man kaba kynnoh kan don ka jingtohkit ka long ka bym lah ban long.
Na ka liang jong u myntri u la ong ba um iohi ban don kam kata ka jingtohkit, namar kaei kaei kaba ka sorkar ka leh ka long katkum ki kyndon jong ka ain.
