Jowai, Jymmang 26: Ka jingslap kaba jur kaba la neh baroh shi miet kala wan rah ia ka jingpynjulor kaba jur bha hapoh Jowai ha kaba bun tylli ki iing briew kila julor ha kane ka jingshah tyllep ha ka khyndew kaba la jia mynta ha ka por sngi.
Ka jingtwa kaba la kham jur palat ka long ha Raitdiengling ha jan jong ka Government Boys ha kaba ka khyndew kala lynshop ia ki iing bun tylli ki iing kiba don hapoh jong ka kila shah pynjulor ha kaba ki kynroh jong ki iing briew ruh kila paid bad ka ktieh kala rung hapoh iing.
Ka jingtwa khyndew ka long ruh ha Raitsaitsim, ka jingslei ka um ha Syntu Ksiar, Yalong, bad shibun ki bynta jong ka sor Jowai kala shah ktah ha kane ka jingtwa khyndew, la iathuh ba kane ka jingtuid jong ka khydew na ki jaka ba twa ka dang iai bteng.
Haba u SP News Agency u la ia kren bad kiba bun ki briew halor ka jingtwa khyndew kila iathuh ba kane ka jingjia ka jia mynta por mynsngi, la iathuh ba mynta ka sngi kala don ruh ka jingbeh jong ka eriong kaba jur bha ha Jowai bad ka iaid sha Ialong.
Kata haduh ba thoh ia kane ka khubor ym shym la ioh kano kano ka jingtip ban don kano kano ka jingjia kaba mynsaw. Na ka liang jong u SP News Agency u la pyrshang ban kren ia ki bor jong ka District Administration ym shym la ioh ban ia kren.
