Nongkhlaw, Naitung 13: Ka Minsitry Tribal Affair jong ka sorkar pdeng, kala bei pisa ban shna ia ka “Museum Cum Cultural Centre Indigenous knowledge” ban ai nam ia u Syiem ka Hima Nongkhlaw u Tirot Sing Syiem, ia kane ka jingtrei nam la shna ha shnong Nongkhlaw ha ka kyntoit at Pomajom, kaba hap ha ka Eastern West Khasi Hills District.
Mynta ka sngi ha u SP News Agency u la leit sha katei ka jaka bala shna ia kane ka iingpynsah nam ia u Syiem ka Hima Nongkhlaw bala ia khun pyrshah ia ki phareng, ka jingpyntrei ka dang iaid sha khmat ban pynkhuid ban pynthikkna ban pyndep ia ka jingtrei ha shuwa ka 17/Naitung/2024 namar ia kane ka jingteinam yn lie da u bah Paul Lyngdoh myntri ba dei peit ia ka riti dustur ka sorkar jylla.
Haba ia kren ba u Syiem jong ka Hima Nongkhlaw u Pa,im Phrester Manik Syiemlieh la iathuh ba ia kane ka skhim la pynioh ha ka por ba long myntri rangbah ka jylla u Dr. Mukul Sangma bad la ioh pat ban pyntrei ha kine ki snem kiba la dep bad mynta laioh ban pyndep kumba la mang ha ka jinglut kaba T.2.5 klur tyngka.
U Pa,im la iathuh ba ha kane ka jaka kim buh pyninam ia ki tiar ki tiar kiba dang don bad ka hima kiba dei jong u Syiem Tirot Sing, la iathuh ba ia mynta kiba ka hima ka don ki long san tylli ki waitlam kiba la pyndon kam ha ka jingiakhun thma bad ki phareng, nangne sha khmat kim dang wat ioh leh se kin don kiba dang lah ban ioh.
Kane ka jaka tei pynsah nam ia u Syiem Tirot Sing kan long ka jingmyntoi kaba khraw khamtam ia ka Hima bad kum juh ia ka jylla, ka hima pynpaw ia ka jingsngewkmen ba ka sorkar pdeng bad ka sorkar jylla kila lah ban pynioh ia kane ka jaka ban pynsah nam ia u nongialeh laitluid ba khraw na kane ka jaidbynriew khasi ia ka jingsynshar donbor ki phareng.
La iathuh ba haduh u snem 1950 la pynshisha ba ka iing jong u Syiem Tirot Sing ka don ha Nongkhlaw, ha kaba don mynta ka Khasi Patriotic Home, namar haduh katei ka snem dang don u wei u rishot jong ka iing, dei ha u tei u snem la wan shim noh da ki briew na katei ka jaka bad la ong bala rah sha Museum Kolkatta kane ka pynshisha ba ka iing u Syiem Tirot Sing do ha Nongkhlaw
La ong ba kane ka jaka kan long kum ka jaka ban buh ia ki jingpynsah nam ia u Syiem Tirot Singh, kan long ka jaka jngohkai ia ki paidbah ba kin tip sha phang u Syiem Tirot Sing bala ia khun pyrshah ia ki pharen bad sha kem bad shah set sha Decca jong ka Bengal bad mynta ka dei ka Dhaka jong ri Bangladesh.
