Shillong, Lber 09: Ka Meghalaya State Legal Services Authority, hapoh ka jingpeit jong u Justice I. P. Mukerji, Chief Justice jong ka High Court ka jylla Meghalaya bad u Patron-in-Chief, Meghalaya State Legal Services Authority bad u nong peit ia ka u Justice H. S. Thangkhiew, nongbishar ka High Court ka Meghalaya bad u Executive Chairman, Meghalaya State Legal Services Authority, kila pynlong ia ka National Lok Adalat ha baroh ki District ha ka sngi Saitjian hapoh ka jingpeit jong ka National Legal Services Authority (NALSA).
Ha kane ka National Lok Adalat baroh ki mukotduma ki don 737 tylli, kiba rim ki don 328 tylli kiba la shim ban bishar ha ka sngi Saitjain ban pynaisuk ia kiba ia ujor bad baroh kiba la tian bishar ha kane ka sngi ki long 1065 tylli ki mukotduma bad ki mukotsuna kiba la lah ban pynbeit ki don 143 tylli bad haba khien ha ka pisa kala kot sha ka T. 75,18,326/- klur tyngka.
