Shillong, Naiwieng 22: Na pdeng kiba la wan ban pyninam ia ki jingshad tynrai ha ka “Tri Hills Ensemble 2024” kaba kham khring ki nongwan jngoh kai ka long ka dei ka kynhunshad na ka shnong Nongsangu na Ri Bhoi District kiba la wan ban pyni ia ka shad bad ka riam Jobulo.
Haba kren ha u SP News Agency u bah Balawan Mihpli Lyngdoh ba ialam ia kane ka kynhun u la ong ba, kane ka shad ka don la ka jong ka khana pateng la bun spah snem mynshuwa bad kala duh teng ruh kane ka shad hynrei la pynim biang ha ki spah snem kiba khat phra.
Ka khana pateng kaba kila ioh halor kane ka shad ka long ba ha ki por hyndai namar jong ka khlam ki briew kane ka shnong Nongsangu kila hap ban phet noh sha them bad ka snem sniew kala wan bad kim don ei ei shuh kila hap ban leit pan jingiarap na kiwei ki shnong para marjan.
La ong ban shu leit pan kumto ruh kam long kumta kila ia pyrkhat ban da riam bad kah ia ki dur khmat bad ryngkat ka phawar ban pynsngewtynad ia ki briew kiba jan shnong haba ki ai ka jingiarap, kumta lyngkot kane ka shad haba la pynim ia ka kala neh haduh mynta.
Kuma kynhun kala leit ban pyninam ia kane ka shad ha ka Monolith Festival ha Mawphlang kaba la pynlong da ka KHADC, kila ia shim bynta ha ka tamasa kaba la pynlong ha NEHU bad ha kane ka tamasa Tri Hills Ensemble la wan ar sien mynta.
