Shillong, Nailur 25: Ka jingiashong dorbar ba kyrpang kaba ar sngi jong ka Khasi Hills Autonomous District Council (KHADC) la shem ba ka don bun ki jingduna haka A.D Rule hakaba la don kam ban wanrah ia ka jingpynkylla ban pynbing pynbiang.
Ha ka por ba u CEM jong ka KHADC u bah Pyniaid Sngi Syiem u la wanran ia ka jingpan pisa shuh ha kaba ia ei bad ka Legislative bad ia ka Cut Motion la wanrah da u bah Teinwell Dkhar, u bah Ronnie V Lyngdoh u la kren ia ka jingpynbeit ha kaba u la ong ba ka rukom ka juh long ba ia ka ophis jong Chairman ym lah ban wanrah ia ka Cut Motion.
Hynrei namar ba la juh leh ha kine ki por kiba la dep la shah ban wanrah ia ka cut motion bad mynta ka sngi ruh la pdiang ia ka cut motion hynrei ha dien ba la ioh ia ka jingpynshai na u CEM la weng noh ia ka cut motion bad la pdiang ia ka jingpan pisa shuh na ka bynta ka Legislative.
U Nongialam ka liang pyrshah ha dien ba la mih jyndat na iing dorbar haba jubab ia ka jingkylli jong u SP News Agency u bah Taitisstarwell u la ong ba kumba ka long mynta ka rule kam shai ha kaba ia dei bad ka jingkhot ia ka dorbar ba kyrpang, kala shu kren ban khot ia ka dorbar kyrpang don kam ia ka jingiasoi lang jong ki MDC 20 ngut ha ka iing dorbar kaba 30 ngut.
U Nongialam ka liang pyrshah u ba dei teng ruh u CEM ba rim ka KHADC u la ong ba don kam ban wanrah ia ka jingpynkylla ha ka A.D Rule ban shai, ha ka jingshisha ka jingkhot ia ka dorbar kyrpang ka dei ban long tang ia kawei ka phang kaba kyrpang ym ban ia khlem lang.
Namar ka rule kam kren shai ka liang synshar kala shim ia kane ka kabu ban wanrah ia ka jingpynkylla ha kaba ia dei bad ki ain bad wanrah ia ki kaiphot bad ka jingpan pisa shuh ka Executive Committee na ka iing dorbar, ia kane la don kam ban wanrah ia ka jingpynkylla.
