Shillong, Lber 30: Ka kynhun kaba don hapoh ka sorkar Meghalaya Democratic Alliance (MDA) mynta ka sngi kala pynbna paidbah lyngba ki tyngdong jingpynsawa ha kane ka sor Shillong ba kan pynlong ia ka jingialang paidbah ha madan Polo ha ka sngi ba ar u bnai Iaiong na ka bynta u kyrtong MP ka UDP u Dr Jemino Mawthoh.
Ia kane ka sorkar MDA hapoh ka jylla Meghalaya la pynlong da kina bun ki seng sain pyrthei ka NPP, UDP, PDF, HSPDP bad ka BJP. Na ka liang jong ka BJP wat la ka don ha kane ka sorkar MDA kaba la ialam da ka NPP kala pynieng iala u jong u kyrtong MP u Bah Sanbor Shullai.
