Shillong, Nailur 22: U Myntri Khynnah jong ka Sorkar Pdeng ba dei khmih ia ka Panchayati Raj, u Kapil Moheshwar Patil u la poi ha nongbah Shillong mynta ka sngi bad peit bniah ia ki skhim bad ki prokram jong ka Tnat jong u ba la pyntreikam da ka sorkar Meghalaya.
U Myntri u la peit bniah ia ki skhim MGNREGA, PMAY-G, NRLM, RGSA bad kiwei kiwei ki prokram ba kyrpang jong ka Sorkar. U Myntri ba dei peit ia ka tnat Community & Rural Development, Sorkar Meghalaya, Bah Hamletson Dohling u la ia donlang ha kane ka jingialang.
U Myntri u la pynpaw ka jingsngewhun jong u halor ka jingpyntreikam ia ki skhim watla kam da don kita ki Gram Panchayat. U Myntri u la ong, “Nga dap da ka jingsngewphylla ban tip kumno khlem ka jingdon ki Gram Panchayat ba pura bad lyngba ki dustur pyniaid shnong tynrai man u dkhot ka long iing ha ki shnong ha Meghalaya ki nohsynniang ha ka jingpyntreikam ia ki skhim jong ka Sorkar pdeng bad Sorkar jylla.”
Ha ka jingai jingkren shaphang ka jingpyniaid jong ki Dorbar Shnong, u Myntri u la ong, “Ha Meghalaya ka jingbahkhlieh jong ki shnong ka paw ha ka jingpyntreikam ia ki skhim Sorkar bad dei na kane ka daw la lah ban pyndonkam T. 1500 klur ka pisa hapoh ka MGNREGA ha ka jylla kaba rit kum ka Meghalaya.”
Ha kane ka jingialang, u Principal Secretary sha ka Sorkar Meghalaya, u Sampath Kumar u la kren shaphang ka kaiphod jingjurip ba dang shen ba la pyllait da ka Sorkar India kaba ai kyrteng ‘Situation Assessment of Agricultural Households and Land and Holdings of Households in Rural India, 2019’.
Katkum kane ka kaiphod, ha snem 2018-19, kawei ka longiing jong ki nongrep ha Meghalaya ka kamai kumba T. 29,348 shi bnai katba ka longiing ki nongrep ha Punjab ki kamai T. 26,701. U Myntri u la pynpaw ka jingsngewhun halor kane ka jingjop bad u la ong ba ki briew jong ka jylla Meghalaya ki la pyndonkam bha ia ki skhim jong ka Sorkar bad ki la ioh jingmyntoi pura na ki skhim kum MGNREGA bad NRLM.
U Patil u la kren shaphang ki jingmyntoi jong ka Swamitva Yojana kaba thmu ban ai ia ka jingpynshisha halor ka jinglong trai jaka ha ki thain nongkyndong da kaba pyndonkam ia ka tekonoloji katkum ka juk mynta. U la ong ba ki jylla kin pynkhreh ia ka property card na ka bynta man ki jingdon jingem ha ka shnong da kaba pyndonkam ia ki jingthew kiba biang ba la leh lyngba ka drone mapping.
Ia kine ki card yn ai sha ki trai jaka bad yn ithuh da ka tnat land revenue records. Haba kren shaphang ka jylla Meghalaya, ha kaba ki jaka puta ki iajngai iwei na iwei, u myntri u la kyrpad ia ka sorkar jylla ban pynkhreh ia ka polisi ban pynbiang ia ka property card sha ki nongshong shnong.
Ka jingai ia ki hok bat khyndew lyngba ki kot ba la ithuh kan pynlah ia ki nongshong shnong ban ioh jingiarap pisa na ki bank da kaba pyndonkam ia ki jingdon jingem jong ki kum ka jingbuh bynda, u la bynrap.
U Myntri u la kren ruh shaphang kumno kalong ki fund jong ka 15th Finance Commission, na ka bynta ki dorbar shnong ban kyntiew ia ki shnong, kiba lah ban ai sha ki dorbar shnong ha ki shnong ha Meghalaya ha kajuh ka rukom kumba la leh ha kaba iadei bad ki shnong ba don ki Gram Panchayat.
U Myntri u la ong ba un sa iakren ia kane ka phang bad ka Finance Commission ban pynkhreh ia ki lad ki lynti ban weng ia ki jingeh ba mad da ki Autonomous District Council bad ki dorbar shnong ha kaba iadei bad ka jingioh jingiarap pisa khnang ba yn lah ban bteng ia ki kam ba bha na ka bynta ka roi ka par jong ki shnong ha kane ka jylla.
U Myntri u la pynthikna ba ka Tnat Panchayat Raj ba la khlieh da u Girirai Singh kan ai baroh ki jingiarap, khnang ba ki shnong ha Meghalaya kumjuh ruh kiwei ki jylla jong ka thain shatei lammihngi kin lah ban pyndonkam pura ia ki jingmyntoi jong ki skhim Sorkar pdeng na ka bynta ka roi ka par jong manla ki shnong.
