Shillong, Risaw 17: Mynta ka sngi u mytnri rangbah ka jylla u la plie paidbah ia ka CM-Elevate ha Jowai West Jaintia Hills District, lyngba kane ka skhim kan iarap 20000 ngut ki samla ban seng kam la jong bad ka sorkar kan pynlut T.300 klur kum ka jingiarap.
Haba kren ha katei ka jingialang u myntri rangbah la ong ba ka jylla Meghalaya ka pynmih haduh 70000 ngut ki samla kiba wad kam, dei na kane ka daw ka pynlong ia ka sorkar ban pynmih ia ki lat ki lynti ba kumno ban pynioh ia ki samla ha ka kam ka jam.
U myntri rangbah u la kren shai kdar ba ka sorkar kan nym lah ban ai kam sorkar ia baroh, namar ha ka shisnem lah ban pynlong sha ki kam sorkar tang kumba 1500 ngut lyngba ka MPSC bad ki DSCs, ban kyntiew ha ka ioh kam ioh jan dei ban pynshlur ha ki kam lajong ka ban kyntiew ia ka ioh ka kot.
U Myntri Rangbah u la pynshisa ba kane ka skhim CM-Elevate ka dei ka jingiarap kaba kot haduh 75% ka shong ha ki jaid kam kaba ki samla ki kwah ban seng kam, ka sorkar kala wanrah ia ka polisi ba kumno ban kyntiew ha ki kam la jong, la ong ba hapdeng 10 bad 15 snem ban wan sa iohi ia ka jingkylla ha ki kam ki jam.
U Myntri Rangbah ka jylla u la ong ba ha kine ki san snem ban sa wan kin sa mih haduh 50000 ngut ki briew kiba seng ia ki kam la jong bad kine ki sa long ki nongai kam ha ki ba bun rukom la ong ba ka sorkar kala dep ban ai jingkyrshan ia ki 1155 ngut ki samla ban seng ia ki kam la jong.
Ha ka jingkren ka MLA Santa Mary Shylla kala kyntu ia ki samla ba kin shim kabu ia kane ka skhim CM-Elevate ban kyntiew ia ka jylla ban poi sha ka thong kumba la buh ba ka khaii pateng ha ka jylla kan kot sha ka 10 billion ha u snem 2028, ha kane ka sngi la don lang ruh u bah Lahkmen Rymbui MLA, bah Wailad Shylla MLA bad buh ki paidbah kbia la wan ban ia shim bynta ha kane ka jingialang.
