Shillong, Iaiong 21: U mot sahnam jong ki khlawait ka Ri na ka jylla Meghalaya, U Tirot Sing Syiem, U Kiang Nangbah bad Pa Togan N Sangma kin sa ieng rasong da ka dur baphuh baphieng shuh shuh ynda la shna da ka durmot ba radbah ha syndah jong u mot laidong ha State Central Library.
La sdang ka jingjurip da u Bah Sanbor Shullai, Myntei, Mattithaw bad Deiriti (Arts and Culture) ha ka jingdon lang jong ki kher ki mer na ka tnat sorkar Mattithaw bad Deiriti, u Bah Frederick R Kharkongor, Commissioner bad Secretary, Arts and Culture bad Kong W A M Booth, Director, Arts and Culture, Government of Meghalaya kynthup ruh ia u barikor rangbah jong ka jylla, Bah Raphael Warjri ha ka ba la aiti ban shtahdur ia kita ki durmot ba thymmai.
Ia u mot laidong bajrong kynshyeng yn sa bynrap da ki durmot ba radbah jong ki laingut ki khlawait ba pawnam ryngkat ka rynsan ba shynna na ka bynta ban kyntiew burom da ki syrwiang syntiew ha ki sngi lyngkhuh snem jong uwei-pa-uwei na ki khlawait.
Ka jingangnud jong ki paidbah kan sa urlong da kane ka jingthmu bad u Myntri korbar Mattithaw bad Deiriti u la shahskhor ia ka jingud jingnam jong ki paidbah khamtam ka jingai jingmut jong ki seng bhalang na ka jylla.
U Bah Sanbor ua la kren mardor ‘Katto katne ki seng bhalang ha jylla ki la aijingmut ban shna da ki motdur ba shynna bad baphuh baphieng jong ki khlawait ka Ri kumba la dep shna ia ki motdur jong ki riewkhraw ka Ri India, ka Indira Gandhi bad u Netaji Subhash Chandra Bose’.
Ki durmat ba thmu ban shna thymmai kin long ki nongmuna ban pynshlur bad ai mynsiem ia ki samla ha kane ka aïom ba rakhe ia ka lyngkhuh snem ba sanphew jong ka jylla bad lyngkhuh hynniewphew san snem jong ka Ri India.
U Bah Sanbor Shullai u la pynbna ruh ba la aiti ia kane ka kam ba kynsai ha u barikor ba donnam ka jylla, Bah Raphael Warjri ban shtah ia ki durmat lyngba ka synjuk ki barikor Khasi, ka Riti Academy, ‘Ka long kaba donkam ban pynshlur ia ki trai jylla khamtam ki samla ba don sap bad u Bah Raphael Warjri u la prat lynti da ka durmot ba kynsai ha khyrdop jong ka shlem Mattithaw bad Deiriti.
Ka jinglut jingsep ha ka bhah ba nyngkong ka long ha ka dor ka ba Laiphew Lak Tyngka, ha ka ba ka tnat sorkar kan sa pynbiang ia ka bhah ba dang buddien haduh ban da dep pura. La khmih lynti ba ka durmot ba nyngkong yn pyndep nogh hapoh ka lai bnai.
