Shillong, Nohprah 02: U bah Paul Lyngdoh myntri ba dei peit ruh ia ka tnad Social Welfare ka jylla u la ong ba ka sorkar kala shimkhia mar ia ioh jingtip ba ki samla kiba leit ban shah summar namar ba kila kyrni na ka jingdih drok kila shah ktah kti ha ka jaka sumar ha Mizoram bad kum juh ha Assam.
Ka sorkar Meghalaya kam shym la sngap jar ban iohi ba ki samla kiba leit ban shah sumar kila shah shoh ha ka jaka sumar kaba don ha Assam, kala thoh sha ka sorkar jylla ba kan ai ia ka jingpynshai.
Halor ka jingduna ki jaka ai jingsumar ha ka jylla ha kaba ki kmie kikpa kila hap phah sha bar ka jylla, u myntri u la kubor ba ka dei ka jingshisha namar ki jaka sumar kiba dei jong ka sorkar ki don tang 9 tylli kiwei pat ki dei jong ki riew shimet.
U myntri u la ong ban dang pynbun shuh shuh ia ki jaka ai jingsumar, la iathuh ba ha u snem 2025 ka sorkar kan sa plie sa 20 tylli ki jaka sumar jong ka sorkar ha kane ka jylla, haba ia dei bad ka bai shah sumar u la ong ba ka don ka jingiapher ha ki jaka ai jingsumar jong ki riew shimet.
Ka sorkar kam shym ieh kumta, ki don kiba la pyniaid da ki riew shimet kiba ka sorkar kala iarap pisa katto katne bad ki don ruh kiba ka sorkar ka bei lut ia ka jinglut, kine ki don ki lah ban ngiam tang kumba 30 ngut ei ei kawei kawei ka jaka sumar kumta ka sorkar kan shna shuh sa 20 kyntlli ha u snem 2025.
