Shillong, Iaiong 06: U Chief Electoral Officer (CEO) jong ka jylla Meghalaya u Bah Fredric Roy Kharkongngor haba kren shuwa ban khaweh ia ka lama, na ka bynta ka jingpynmareh ia ka Biskil, u la ong ba kane ka long ban kyntu ia ki paidbah ba kin ia mih ha ka sngi thep vote ban jied ia u nongmih khmat da kaba ia shim bynta ha ka jingiathep vote.
U Bah Kharkongor u la ong ba, ki don ki briew ki leit ban thep vote bad kane ka jingleh kam dei ka jingialeh pyrshah jong ki, hynrei ka jingbym leit ban thep vote ka pyni ba phi la pyndem ia ka hok ka jong phi da kaba khlem thep ia ka vote, u la kyntu ba dei ban ia mih paidbah ban pyndon kam ia kane ka hok kaba ki don.
Ban pynshlur ia ki paidbah ba ki dei ban pyndon kam ia ka hok ka jong ki ban thep ia ka vote, ha kane ka sngi u CEO u la khaweh ia ka lama na ka bynta ki lai tylli jingiakop niah, kawei ka dei ka jingiakop niah Baiskil, ka jingiakop niah iaki bike “Royal Enfield” bad ka jingniah ban pyninam ia ki kali ba dei ki Jeep kiba la rim tam ha kane ka nongbah Shillong.
Ha kane ka sngi ki heh sorkar kiba la ia don lang nalor u CEO, la don u DEO, SP jong ka East Khasi Hills, SP City jong ka nongbah Shillong bad bun kiwei kiwei ki heh sorkar kiba dei na ka tnad ilekshon jong ka sorkar jylla.
