Shillong, Nailar 27: Mynta ka sngi u president jong ka party HSPDP u bah K P Pangniang u la leit ban ia ia ka jingthoh sha u myntri rangbah ka jylla ban kyntu ia ka sorkar ba kan ai jingmut sha ka sorkar pdeng ba kan wanrah ia ka jingpynkylla ia ka Para 12(A)(b) kaba don hapoh jong ka khyrngit kaba hynriew jong ka riti synshar.
Haba kren ha ki lat pathai khubor u bah Pangniang u la kdew ba katkum katei ka para 12(A)(b) lada u president ka Ri India lada u don ka mon ka long ba u lah ban pynlait ia ki ain ka sorkar pdeng ba kin nym trei kam ha ki bynta kiba hap hapoh ka khyrngit kaba hynnriew ha kane ka jylla.
U bah Pangniang u la ong ba kum ka ain MMDR Act kaba dei ia ki marpoh khyndew, Conservation of Forest Act 1980, kaba mut ba ka sorkar jylla kam don bor shuh ban thaw ain halor ka khyndew ka shyiap, ka khlaw ka btap kaba long katkum ka riti dustur ha ngi.
U President ka HSPDP u l ai nuksa ia u dewiong naduh ba la tukla ka NGT ka jylla kam lah shuh ban ai laisen lane wat ban thaw ia ka polisi thih ia ki marpoh khyndew, kumba ka long mynta la hap ban ioh na ka sorkar pdeng ia ka jingbit ban khaii pateng.
U bah Pangniang u la ong ba ka jingkwah ka party HSPDP ban wanrah ia ka jingpynkylla ia ka para 12(A)(b) ka long ba hangto hapoh ka khyrngit kaba hynriew ka don ka ktien Preident, lada weng noh bad buh noh da ka ktien Governor, ba ka para 12(A)(b) jong ka jylla Meghalaya kan long noh kum jong ka para 12(B) jong ka jylla Assam.
Katkum katei ka kyndon ka sorkar Assam ka don ka bor ha kino kino ki bynta jong ki Territorial Council hapoh ka jylla ba kino kino ki ain jong ka sorkar pdeng ki bym ia hap bad ka riti dutur, ki bym ia hap bad ka rukom bat ia ka khyndew ka shyiap ki ain ka sorpdeng kin nym lah ban trei kam lada lah ban ioh ia kane ka jingpynkylla.
Ha kane ka jingiakren na ka liang jong u mytnri rangbah ka jylla u Cornad K Sangma u la ong ba ka sorkar kala shim khia ia kane bad u la ong ba kane ka dei kawei na ki jingai jingmut kaba ka sorkar ka kwah ban wanrah ia ka jingpynkylla ha ka khyrngit kaba hynriew.
Ha kane ka jingiakren u myntri rangbah ka jylla u la ong ba ka sorkar jylla kan sap hah sha ka sorkar pdeng ia kane ka jingai jingmut ban pynkylla ia ka khyrngit kaba hynriew jong ka riti synshar, halor kane kum ka party lei ka kwah ba ka sorkar kan shim da ka rai jong ka sorkar hapoh ka iing dorbar, hynrei namar ba la pdiang da ka cabinet ka mut ba ka sorkar kala pdiang.
Kawei pat kaba ia dei bad ka jingbuh ia ka village Council bad ia ka Municipal Council ha kane ka jingai jingmut ban wan rah ia ka jingpynkylla ia ka khyrngit kaba hynriew ba ka sorkar Meghalaya kam dei ban pdiang ba kan don ka ilekshon kum ha ki rithor.
La ong haba pynkylla ia ka khyrngit kaba Hynriew kam dei ban don ka ilekshon ha ki shnong ia kata ka Village Council ne Municipal Council namar la don lypa ki dorbar shnong ba la jied da ki paidbah ha ki shnong.
Kumba ka long ka jylla ka dep ban don lypa ia ki rangbah shnong ki sordar shnong ba ai kan District Council ba kan don ka bor ban khmih bad kam don ruh ban don ia ka Muncipal Council namar ha Meghalaya kila don lypa ia ki ain ha kaba ia dei bad ki dorbar shnong, ki Syiem ki Doloi bad ia kane ka cabinet kin sa shong ban ia kren.
Ka party ka ai ka jingkyrshan kaba pura ha kaba jingai jingmut ban wanrah ia ka jingpynkylla ha ka 12(A)(b) ban pynneh pynsah ia ki riti dustur jong ka jaidbynriew khamtamha ka khydnew ka shyiap ban pynbha shuh shuh ia kane ka bynta, la ong u bah KP Pangniang.
