Shillong, Naiwieng 27: Ka ophis jong ka Khasi Hills Autonomous District Council, lyngba ka tnad Trade kum shi bynta ban pyrkhing ia ka kam khaïi pateng jong ki bar jylla ki bym biang ia ki kot ki sla, mynta ka sngi ka 27 tarik u Naiwieng kila leit sha ka thain Laitumkhrah ban khynra naphang ia ki dukan bym biang ki kot ki sla.
Ia kane ka jingkhynra la ialam hi da u Bah Fantin Lakadong uba dei u Executive Member ba peit ia ka tnad Taxation bad u Bah Teibor Pathaw uba dei u Executive Member ba peit ia ka tnad Land, ha ryngkat bad ki heh ophisar ka tnad Trade lem bad ki ophisar ka tnad Enforcement.
Ka jingkhynra la sdang na Fire brigade ter ter ia ka thain Beat House kumjuh ruh ha ki bynta jong ka iew Shyllong bad kumjuh ruh ha Police Point shaduh sha Don Bosco Square. Katba ka jingkhynra ka dang iaid na ka liang ki bar jylla kiba shong die jingdie ha madan kila iathuh ba ia ki la ai bor da ka Meghalaya and Greater Shillong Progressive Hawkers and Street Vendors Association.
Halor ka jinglap ia ki dukan ki bym biang ia ka licence na ka liang ki ophisar ka tnad Enforcement kila khang khyrdep noh ia ki dukan bad ia ki ba shong die madan la bthah ba kin pynbiang ia ki kot ki sla bad la pynsangeh noh shwa ia ka jingdie madan.
Haba ia kren bad ki lad pathai khubor u EM ka Taxation u Bah Fantin Lakadong u la ong ba ka Executive Committee kan ym kut ban khynrai tang sha ka thain Majai lane ha Iewduh hynrei kaei kaba leh ha kine ki khyndiat kadei ka jingsdang.
Shuh shuh u la ong ba ka KHADC kala shim ia ka sien jam ba kan dang pynkhlain shuh shuh ia ka jingkhyra trading licence sa sha kiwei pat ki bynta jong ka ri Khasi kiba hap hapoh u pud u sam jong ka KHADC.
U Bah Fantin u la iathuh ba ha kane ka jingkhynra la shem ba bun ki bar jylla ki iaid lait ban leh ia ka professional tax bad kane ka long ka jingduh ba khraw ia ka council bad u la pyntip ba ki bar jylla kiba leh ia ka khaïi pateng ha Laitumkhrah ka long ba 80 na ka 100 kidei kiba la biang ia ki kot ki sla ha kaba iadei bad ka trading licence.
