Shillong, Jylliew 4: ka kabinet kan shong jingialang haka sngi balang jong ka taiew ban wan ban iakren halor ka phang la yn aiti ne em iaki katto katne ki bynta treikam jong ka MeECL ban pyniaid da ka Rural Electrification Coorporation Limited la ong u myntri rangbah ka jylla u Conrad. K. Sangma.
U myntri rangbah ka jylla haba jubab iaka Jingkylli hato ka dei ka jingaiti sha ka riew shimet, ne ka jingaiti sha ki riew shimet ban shu pynpeit ne ba kin shu pyniaid da ki riew shimet ia ki katto katne ki bynta ka MEECL. Halor kane u myntri rangbah u la ong ba kam don satia kata ka jingthmu ban aiti ,ban peit lane kin pyniaid iaki katto katne ki bynta treikam ka MeECL.
Ban pynshai shuh shuh halor katei ka jingkylli u la ong dei ban sngewthuh ba ka MeECL ka shah bai bor ding elektrik kum shaka NEEPCO, NTPC bad kiwei ka ba la kynjoh shaka t. 13spah klur tyngka ban pyllait iaka MEECL na ka jingkit ram bad iaka jylla na ka jingshah ot light ka sorkar ka la shim iaka rai ban shim iaka ram kaba T.1300/- klur na ka REC bad ka PFC lyngba ka Nirmaan Bharat.
Haba ia dei bad kane ka jingshim ram ka REC ka la buh iaka kyndon iaka sorkar jylla haki ar bynta, ka bynta kaba nyngkong ba ka REC ka la buh ba ka sorkar jylla ka dei ban ai 100% iaka jingbat khlieh iakane ka ram. Da kaba pynrung iaka pisa haka jingmang tyngka jong ka jylla, ka kyndon kaba ar ka long ba ka sorkar jylla ka dei ban ai peit katto katne ki bynta jong ka MeECL.
Haba iadei bad kane kam pat don kano kano ka rai, hynrei na ka liang ka MeECL, ka tnad bor ding u myntri ba dei peit iaka tnad bor ding Kim kwah ban aiti wat khyndiat ruh iaki bynta jong ka MeECL ba kin pyniaid lem.
Ka jingkylli kaba la buh da ka tnad pla pisa ka jylla ka long hato ka sorkar jylla kan lah mo ban bei shi bei tyngka iaka MeECL khlem da don kano kano ka jingpynkit khlieh lem shaka MeECL, namar haki 10 snem ban wan hap ban siew T. 2000/- klur sha ka REC bad PFC, namar katkum kane ka jingkhein lada ka sorkar jylla ka hap ban shim iaka jingbah khlieh ka hap ban sei t.560 klur tyngka.
U myntri rangbah u la ong haba peit iakine ki jingkhein kala don ka jingiakren ba 75% iaka ram dei ban bah khlieh da ka sorkar jylla bad 25% kan shim iaka jingkit khlieh da ka MeECL, hynrei kam pat don kano kano ka rai namar ym pat ia kren hapoh ka Kabinet.
U myntri rangbah u la ong ba lada dei ban ai pyniaid sha ka REC kumba 25% kan nym don kata ka jingwengkam iaki nongtrei. Hakajuh ka por ka REC kan long tang ka nongpynpeit bad kan ai ka jingiohnong ba kham bun sha ka MEECL, u myntri rangbah u la kren shai ba kine ki dang long tang ki jingpyrkhat kam pat don kano kano ka jingiasoi soskular.
U myntri rangbah u la pynshai biang ba ka kabinet kan iashong biang haka sngi balang jong ka taiew ban wan ban shim iaka rai la ban aiti ne ban kyntait iakane ka jingpyrkhat haka iadei bad ka MeECL namar ka sorkar haba kan shim iakano kano ka rai kan shim beit na ka bynta ka jingbha jong ka jylla baroh kawei.
