Shillong, Nailur 14: Ka jingsaphriang kawei ka durkhieh ha poh ki ryngsan social media ka ba la paw halor ka jingshah thombor jong u wei u khynnah rit ha ki katto katne ngut ki khynnah ki ba la sub aba ki lah ban dei hapdeng ka juh ka kyrta.
Kat kum ka jingsuba la kynnoh ba kane ka jingjia kala jia ia u wei u khynnah jong ka skul St Anthony’s Higher Secondary School Shillong ha kaba ha ka dur khieh la sakhie ba ki khynnah kiba thombor ia une u khynnah ki la phah ia un ban doh ia ka juti jong uwei na pdeng kine bad ruh sa ka shoh ka dat ia une u lanot u ba don marwei hapdeng ka jingshah ker kut ha katto kattne ngut ki khynnah.
Ha ba buddien ia kane ka jingjia la ioh ban ia kren bad u Principal jong ka St Anthony’s School u Fr Anthony Kharkongor u la ong ba ma u ruh u la dap da ka jingsngew lyngngoh hadien ba u la iohi ia kane ka Bideo ka ba la saphriang.
La iathuh ba ha ka 7 tarik u Nailur 2024 ka la don ka jingiakob phainal jong ka Inter School Basketball Tournament ba la pyniaid da ka Donbosco ha ka ba ha kne ka jingiakob la khot sngewbha ia ki skul bapher bapher ki ba don hapoh ka nongbah Shillong ban ia shimbynta ha ka ban wan sakhie ia kane ka jingiakhun.
U Fr Anthony u la iathuh ruh ba katba ka jingiakhun ka dangiaid shakhmat u la ioh jingtip ba ki ladon ka jingiasoh shadien jong ka madan hynrei ki dei tang ki khynnah kiba dangrit.
Haba u pyrshang ban wat jingtip halor kane, ym lah ban ioh jingtip kidei ki khynnah skul Jongno namar ba hakane ka sngi ki la don bun ngut ki khynnah skul ki ba la wan ha katei ka sngi.
Na ka liang ki pulit ha ba ki la ioh jingtip halor kane ka jingjia ki la leit sha kane ka jaka bad ki la rah noh ia kine ki khynnah sha thanad na ka bynta ban pynlong ka jingthohkit. Na ka liang ki pulit ki la khot ruh ia ki kmie ki kpa jong kine ki khynnah ki ba donkti ha kane ka jingiashoh.
U Fr Anthony u la ong ruh ba kito ki khynnah kidei na ki skul ki ba don ha kylleng kylleng bad ki don ruh ki ba la kam ba kidei na ka skul jong ngi hynrei kim dei pat, ki la shu thok bad lehse ki shu kwah ban pynbudnam ia ka skul. U la ongruh ba kat ka jingioh jingtip jong u ki ba bun na kito ki khynnah ki ba ha ka durkhih ki dei ki Garo bad Bengali.
U Fr Anthony u la ongruh ba marsien iohi ia katei ka Bideo kaba la saphriang marmar u la leit ban kylli bad watbniah na ki khynnah ki ba dei ki Garo bad Bengali ki ba pule ha St Anthony’s School, hynrei um lap satia ia ki ba kindei napoh kane ka Skul.
U la ongruh ba hadein ka jingsaphriang jong katei ka durkhih ha ki social media ka la pynjah burom bad pynhiar kyrdan ia ka nam jong ka skul ha ka ba na ka liang ki kmie ki kpa ruh ki la don ka jingartatien bad ka jingduh jingshaniah ha ka skul.
U Fr Anthony u la ongruh ba kumkine ki jingjia kim ju jia satia ha ki jingialeh kai ha ki por ba la dep namar kata u la kyntu ia ki kmie ki kpa jong ki khynnah skul ba kin long ki ba husiar namar va ha kine ki ba mynta ki ba bun na ki khynnah kiba juhleh ia kum kine ki kam ka dei namar ka jingbym don por ki kmie ki kpa ban sneng ban khraw bad ban pyni ia ka jingieid ia ki khun.
