Shillong, Nailur 28: U Bah Pious Marwein MLA jong ka Ranikor u la leit ban jngoh ia ki long iing kiba mat ia ka jingjia ba sngewsih ha ka jingshah rong noh ha ka um ha wah Tihiang kiba dei na ka shnong Mawjai, ha South West Khasi Hills District.
Haba kren ha u SP News Agency u la ong ba ha dien ba u la wan phai na katei ka jaka ba don katei ka jingjia ha kaba hynriew ngut ki mynsiem briew kila duh ha ka jingjia kaba sngewsih, u la ong ba u la bthah ia ka Deputy Commissioner bad BDO ba kin phah ia ka kaiphot sha ka sorkar.
Haba ia dei bad kane ka jingjia, u bah Pious u la ong ba la shai ka sngi yn phah ia ka jingthoh sha u myntri ba dei peit ia ka tand “Disaster management” ba kyntu ia ka sorkar ba ka dei ban ai jingiarap ia kito ki long iing kiba la mat ia kane ka jingjia kaba sngewsih.
La iathuh ba na ka liang jong u kum u MLA jong katei ka jaka u la ai ka jingiarap ia ki bad un dang ai shuh ka jingiarap namar kitei ki long iing ki long shisha kiba duk bad ki don ki iing kiba la duh noh ia u kpa bad ki don ki iing kiba la duh noh ia ka kmie.
U bah Pious u la ong ba na ka liang jong un shim khia ban peit ba ka sorkar ka dei ban iarap ia kitei ki long iing kiba la mat ia kane ka jingjia kaba sngewsih ha dien ba ka sorkar kala ioh ia ka kaiphot na ka DC bad BDO jong ka District.
