New Delhi, Jylliew 19: U Myntri ka tnat Consumer Affairs bad Food and Public Distribution, u Ram Vilas Paswan mynta ka sngi u la pynlong ia ka jingïalang lyngba ka video conference ban khmih bniah halor ka jingiaid sha khmat ka jingpyntreikam ia ka reshon card jong ka NFSA ha baroh kawei lyngba ka prokram One Nation One Ration Card (kawei ka ri kawei ka rashon card).
Ka jingthmu jong kane ka jingïalang ka long ban sngewthuh ia ka jingpynkhreh bad ka por ba la buh ban pyntreikam ia ka prokram kawei ka ri kawei ka rashon card, ha ki 14 tylli ki jylla bad ki union territory.
Ki Myntri napoh ki 5 tylli ki jylla/union territory kiba kynthup na Assam, Chhattisgarh, Delhi, Meghalaya bad Tamil Nadu ki la iadon ryngkat ha kane ka jingialang, katba kwei jylla ki la phah ki secretary jong ki tnat Mar Bam.
Na ka liang u Paswan u la ong ba ha ka por ba don ka khlam COVID-19, kane ka prokram kan long ka jingmyntoi kaba khraw na ka bynta ki nongtrei bylla kiba iaid na kawei ka jaka sha kawei pat, ki briew kiba sahkut ha kiwei pat ki jylla bad ki briew kiba donkam ia ka jingiarap ban ioh ia u khaw lyngba ka prokram kawei ka ri kawei ka reshon card.
U la pynpaw ba hapoh u Nailur 2020, sa lai tylli ki jylla kiba kynthup ia ka – Uttarakhand, Nagaland and Manipur yn shah kynthup ha kane ka prokram bad na ka liang kane ka tnat ka dang pynkhreh ia baroh ki jingdonkam ban kynthup ia baroh ki 14 tylli ki jylla hapoh ka prokram ONOC ha kaba kut jong une u snem.
Na ka liang u Paswan u la ong ba u khaw u don hapoh ka buffer stock bad u la pyntikna ruh ba yn nym don ba shah thngan ha kane ka por ba don ka jingpang COVID-19.
Shuh shuh, u la iathuh ba kumba 10 tylli ki jylla ki la dep ban thoh sha ka tnad Kam Sam Bam ban pyniar ia ka jingsam ei ia u khaw hapoh ka PMGKAY na ka bynta lai bnai.
Ha ka por ba don ka jingiakren, bun na ki jylla/union territory kiba dang shah ki la batai ia ki jingpynkreh ban pyndep ia ki kam baroh hapoh kaba kut jong u bnai Nailur, ha kaba ki 3 tylli ki jylla kiba kynthup ia ka Arunachal Pradesh, Meghalaya bad West Bengal ka la pynpaw ba kan sdang ia kane ka kam hapoh u Nohprah 2020.
Ha kane ka jingïalang, ki jylla/union territory kiba kynthup i aka Andaman & Nicobar Island, Arunachal Pradesh, Lakshadweep bad Meghalaya ki la pynpaw ia ka jingeh halor ka jingsuki ka internet bad ka jingbymbiang ka network.
Na ka liang u Paswan u la pyntikna ba ka jingeh namar ka jingsuki lane ka jingbymbiang ka network yn iakren bad ka tnat Telecommunications na ka bynta ban wad ia ki lad ki lynti ban pyntikna ia ka jingpyntreikam ia ka prokram ‘One Nation One Ration Card’ ka long kaba iaid beit iaid ryntih ha baroh kawei ka ri.
U Myntri Khynnah ka tnad Consumer Affairs, Food & Public Distribution, u Raosaheb Patil Danve u la ban jur halor ka jingdonnkam pyntreikam ia kane ka prokram ha ki jylla bad ki union territory kiba dang sah.
U la ong ba dei na ka daw jong ka ONOC scheme bun na ki nongbylla kiba iaid na kawei ka jaka sha kawei pat ki la ioh ia ka bhah jong u khaw food grains quota ha kum kane ka por ba don ka khlam COVID-19.
Haba ia jingkren pynkynkut, u Paswan u la ong kyntu ia ki jylla kiba dang sah bad ki union territory ban pyndep ia ka biometric bad ka ePoS, khang ba ki briew kiba dei ban ioh ia u khaw reshon ki la lah ban shim ha ka por kaba duna na kano kano ka bynta ka ri India.
