Shillong, Iaiong 08: U Dr WR Kharlukhi state president jong ka party NPP, haba kren halor ka jingkular ilekshon jong ka party BJP kaba la pynlait mynta ka sngi kaba la kren shai ba lada ka BJP kan wan ha ka bor kan pyntrei kam ia ka CAB, na ka liang jong u tei u nongialam ka NPP u la ong ba ka party kala dep ban kren shai ba kin pyrshah beit ia ka CAB.
Haba kren ha ki ladptahai khubor mynta ka sngi ha ophis trei kam jong ka party NPP ha Lachumier u la ong ba ia ka party NPP la seng nongrim ban iada ia ki riewlum jong ka dong shatei lam mih ngi jong ka Ri India bad lada ka don kano kano ka jingleh kaba ktah ia ki paid riewlum ha kane ka thain ka party kan pyrshah beit la ka dei ka CAB ne kiwei ruh.
La ong ba ka NPP ha ka jingialang jong ka National Executive Committee kala ia kren shai ba lada ka BJP ka wan ia ka CAB ha kata ka por kin ia khlad lok noh na ka NDA, kane ka la shai kdar halor ka nongrim ba ka NPP ka ieng halor ka CAB, ia kane ka jubab ka long halor ka jingkylli hato ka NPP ka don aiu ban ong halor ka kular ilekshon jong ka BJP ba ka NPP ruh ka dei ka dkhot jong ka NDA.
Haba jubab ia ki jingkylli ha kaba ia dei bad u myntri rangbah duh jong ka Ri u Narendra Modi na ka liang jong u National Vice President u Dr DD Lapang u la ong ba un nym lah ban ong ei ei namar kata ka dei ka kam jong ka BJP, kam dei ka bynta jong ka party NPP.
