Shillong, Jymmang 10: Ka seng Hynñiewtrep Integrated Territorial Organization (HITO) Ribhoi District kala phah ia ka jingujor jong ka sha u ka Deputy Commissioner jong ka Ri Bhoi District halor ka jingbuh sngi ka Central Election Committee Umsning Town Durbar Raid Mawbuh ban pynlong ia ka elekshon ban jied ia u rangbah shnong hapdeng ba don kane ka khlam COVID-19.
Ka seng HITO kala phah ia kane ka jingujor sha ka Deputy Commissioner Ri-Bhoi District pyrshah ia ki nongkitkam ka Umsning Central Election Committee Umsning Town Durbar Raid Mawbuh,Mylliem Syiemship Ribhoi District.
Ka seng HITO ka kyrpad ia ka ophis jong ban pynsangeh kyrkieh ia ka kam jied Rangbah Shnong , ban pynsangeh shwa ia ka jingkhot thep kyrteng bad pynlong jied rangbah shnong ia ki 6 tylli shnong kiba hap hapoh ka jingpeit Umsning Central Election Committee Umsning Town Durbar ha ka 29th May,2021.
Na ka liang jong ka seng kala ai lang ia ka jingthoh kaba la pynmih naka ophis jong Umsning Central Election Committee Umsning Town Durbar. Ba ka Umsning Central Election Committee Umsning Town Durbar ka la pynmih ia ki kyndon aiñ ba ia tyngkhuh bad ka Khasi Social Custom of Lineage Act bad Article 14,15,16 jong ka riti synshar jong ka ri india.
Ka jingkhot pynlong dorbar da ka Umsning Central Election Committee Umsning Town Durbar haka ne ka por ka long pyrshah ruh ia ka aiñ Epidemic Diseases Act, 1897, bad kumjuh ruh ia ka aiñ jong ka The United Khasi-Jaiñtia Hills Autonomous District (Prevention Of Epidemic Diseases) Act 5.
Bad katkum ka shithi ba la soi da u Secretary to the executive committee KHADC NO.DC11/Genl/78/2020/2021/12/284 dated Shillong 27th Iaiong, 2021 ka la pynbna ban pynsangeh shwa ia baroh ki jingialang naka ka daw ka jingsaphriang u khñiang jingpang covid-19,ia ka shithi la soi da u bah Ban Kharnaior, President Ribhoi District Cum Joint secretary ka seng kmie.
