Shillong, Iaiong 12: Ka Shad Suk Mynsiem kaba lai sngi lynter kaba la pynlong da ka seng khasi seng kmie ha Madan Weiking kala kut mynta ka sngi hapdeng ka jingshongkun ha kaba ki nongshad kila ia poi na kylleng katkum ka pass kaba kila iohi katkum ka jingpyniaid jong ka seng.
Ha kine ki sngi baroh ki nongshad kiba la ia poi ia shim bynta ki long, ha ka sngi noh ktaj ki long 54 ki kynthei bad 96 ki shynrang bad ha ka sngi ba ar, ki nongshad shynrang kila ia poi 134 ngut bad ki kynthei ki long 131 ngut bad ha ka sngi kut ki nongshad shynrang ki long 313 ngut bad ki kynthei ki long 284 ngut.
Mynta u snem na ka daw jong ka jingdon kane ka khlam COVID-19, la shah ban rung sha madan Weiking tang ia u ne ka nongshad bad ar ngut ki nongsynran, katba ia ki paidbah ym shym la shah ban wan peitkai ha kane ka sien shad mynta u snem.
Ka jingshah ainguh ia u trai nongbuh nongthaw kala iaid beit iaid ryntih naduh ka sngi noh kjat ha ka sngi saitjain naduh ban da kut mynta ka sngi, ki nongshad kynthei bad shynrang kila ia shim bynta da ka jingkmen ban ioh ban pyni iala ka jong ki riti dustur.
Ha kine ki lai sngi lynter ba don kane ka Shad Suk Mynsiem, na ka liang jong ka seng khasi seng kmie kala bud ryntih ia baroh ki kyndon katkum ka jingbit kaba la ain a ka sorkar bad na ka liang jong ki bor ba dei peit ia ka District Administration ruh kila ia don lang ha kine ki lai sngi.
