Shillong, Jylliew 17: Ha ka elekshon MP kaba 18th sha ka iing dorbar Lok Sabha ka kynhun National Democratic Alliance (NDA) kala jop 293 ngut ki MP bad ka National People (NPP) ka dei kawei na ki dkhot ka NDA kaba don uwei u MP hapoh Rajya Sabha.
Ka party NPP ka don ki MLA hapoh ka jylla Manipur 6 ngut, Nagaland 5 ngut, Arunachal Pradesh 5 ngut bad ha Meghalaya 28 ngut. U Dr. W.R Kharlukhi MP sha Rajya Sabha bad ka por jong u kan kut ha ka 21/Jylliew 2026.
Ha kane ka sorkar Modi-.03 ka party Republican Party of India (Athawale) kaba dei ka dkhot jong a NDA ka don 2 ngut ki MLA hapoh ka jylla Nagaland bad wei u MP sha Rajya Sabha u Ramdas Athawale bad ka por jong u kan kut ha ka 2/Iaiong/ 2026 kum u MP Rajya Sabha.
U tei u nongialam jong ka RPI ha ka sorkar Modi. 02 bad ha kane ka sorkar jong u Modi.03 la ioh ban rung ha ka kynhun myntri hapoh ka sorkar pdeng kum u myntri khynnah wat la kane ka party kam shym don wat tang u wei u MP sha Lok Sabha.
Ha kane ka sorkar NDA kaba mynta ka jingpynsmai ia ki myntri sorkar 30 ngut ki mytri kabinet. 5 myntri khynna ba dei peit ia ki tnad sorkar, 36 ki mytri khynnah kiba iarap ia ki myntri sorkar ba roh ki long 71 ngut.
Ki nongpeit pyrman ha ka sian pyrthei ki buh ka jingkylli hato ka party NPP kaba dei kawei na ki dkhot a NDA kaba ia trei lang bad ka BJP, ha Meghalaya ka NPP ka ialam ia sorkar bad ha kiwei ki jylla ka kyrshan ia ka BJP, hato ka BJP kan ai myntri ne em ha ka sorkar pdeng.
Ki shuki myntri kiba dang lait ha ka sorkar pdeng ki don 10 tylli, lada ka RPI kaba don tang u wei u MP ha Rajya Sabha bad ar ngut ki MLA la pynrung ha ka kynhun mytnri ha ka pdeng ka jingylli ka long hato ka NPP kan ioh lat ne em ban ioh rung ha ka kynhun myntri kaba yn sdng pynsamai biang.
