Shillong, Nohprah 27: Kat kum ki kyndon ban pynlong ia ka elekshon sha ki District Council ka sorkar Meghalaya baroh shikatta ka but ia ki kyndon jong ka Election Commission jong ka Ri India ba ia ka jingpynkhreh ban pynlong ia ka elekshon ka dei ban long hapoh ka 45 sngi.
Ka iing dorkbar jong ka KHADC bad JHADC kan kut u bnai Lber hapoh ka phra tarik bad ia ka elekshon dei ban pyndep ha shuwa ban kut u bnai Rymphang, kaba mut ba ka tnad ba dei peit District Council Affair jong ka sorkar jylla kala hap ban pynbna ia ka elekshon hapoh ka shiphew tarik jong u bnai Kyllalyngkot 2024.
Bun na ki nongpeit pyrman ka long ba bun na ki kdew ba kaneka sorkar MDA-II hapoh jong ka jingialam jong ka NPP kala pynshuba ia ki ba bun ba lang ba kin pynjlan ia ka por namar mynta ha KHADC ka dang don ka jingpynbeit thymmai ia ki shnong ha ki konstitwensi jong ki MDC.
Kane ka Kommittee kala iaid sha khmat ban pyndep ia ka kam jong ki bad kila sdang ia ka jingiakynduh ia ki briew jong ki konstitwensi bapher bapher ban sngew ia ka jingpynsngew ka jong ki bad kila buh ruh ia ki sngi ban ia kynduh bad ki pidbah ban ioh ia ka jingpynsngew ka jong ki.
Katba ka JHADC ha duh mynta kam pat thaw ia ka Delimitation Committee, kumba ka long ka JHADC ka don 7 tylli ki MLA Konstitwensi bad 29 tylli ki MDC konstitwensi, kan long kum ba ka long ha KHADC ba ki don 11 tylli ki MDC Konstitwensi ba ka heh ka MDC Konstitwensi ban ia ka MLA Konstitwensi.
Ki paidbah mynta ki buh ka jingkylli hato ka sorkar kan pynjlan ia ka elekshon sha ka iing dorbar thawain jong ki ar tylli ki District Council ka KHADC bad JHADC, la pynkynmaw ba ia ka GHADC kala don ka jingpynjlan ia ka jingtrei kam jong ka da shisnem lynter.
