Shillong, Nailar 07: Ka KSU West Jaintia hills district Unit ryngkat ba ka KSU War Jaintia Circle ha ka 7 tarik Nailar 2024 ka la leit jurip iaki sha ki bynta ki thaiñ Dawki- Amlympiang bad kiwei de ki jaka khap-pud bad ka Ri Bangladesh naka bynta ban ia kynduh bad ki Nongialam jong kitei ki Shnong.
Kane ka jingleit ka long ban iathir halor ki jinglong jingman ha shi lynter ki bynta khap-pud khamtam halor ka jing Jia ka kam poh-ing jong ka Ri Bangladesh. Ha kane ka jing ia kynduh lang ka seng ka la ioh ban iamir jingmut ia shibun ki mat kiba naka liang ka Seng bad ki Dorbar Shnong.
Naka Liang ka Shnong bad ka Seng ki la ia shim iaka rai ban long kiba lah khreh ban ia khun lang ia kino kino ki jing ialeh lada ka long ha kano kano ka bynta ruh lada ki khar Bangladesh ki thmu ban wan tur beain shaka Ri ka jong ngi la ong ka kyrwoh.
Ha kane ka sngi ka seng ka lah ioh ruh ban ia kynduh ia u Officer Incharge jong ka Infiltration Dawki bad la ioh jingtip ba ki nong Bangladesh ki pyrshang hi ban rung sha Meghalaya (India) hynrei Kim ioh shuh ban rung namar ba ka ophis Migration jong ka Bangladesh ka khang.
Naka Liang jong ka seng ka lah ioh ruh ban jurip ia katto katne tylli ki jaka kiba ki khar Bangladesh ki ju pyndonkam ban rung tuh sha ka Jylla Meghalaya (India) kawei na kine ki jaka kadei haka Shnong Amlympiang ha kaba bunsien ki khar Bangladesh ki ioh lad bha ban rung sha poh ka Ri ka jong ngi bad ngi ioh jingtip ba haduh mynta ki khlem don ki BSF ban peit pyrman ha kane ka jaka.
Ka seng ka lah ioh ruh ban ia kynduh iaki Nongialam Shnong jong ka Bakur bad Dawki bad ki iathuh ba haduh mynin ba naka liang ki khar Bangladesh kila wan ban tur ha ryngkat da kaba khlong iaki maw palat ia ka jaka kaba ki tip kum ka No Mans land ( Zero-point).
Na ka Liang ka Dorbar Shnong ka kwah dik dik ban pynbeit noh ia u pud Sam u ba biang namar haduh mynta na ka Liang ka jong ki Dorbar Shnong Dawki ki juh kongnguh bad ia trei lang bad kibor kiba dei peit.
Hynrei ki khar Bangladesh ki wan klong jubor ia ki maw da kaba Tam pud na ka por sha ka por, kumta na ka Liang ka Seng kan sa shim ia ki sien jam na ka bynta ban iada ia u pud u Sam bad ka jing shong shngain ka ka ri bad ka Jaidbynriew hi baroh kawei.
