Shillong, Nohprah 17: Ki nongtrei jong ka Garo Hills Autonomous District Council (GHADC) mytna ka sngi kila pynlong ia ka jingsangeh trei kam kaba khlem buh por bad ka jingtrei kam ha katei ka ophis kala dohkoh lut mynta ka sngi.
Haba kren ha u SP News Agency u nongialam jong ki nongtrei hapoh jong ka DHADC u Mark Flaming u la ong ba ka jingiakhih kaba khlem buhpor kala sdang mynta ka sngi bad ka jingdawa ka long ban siew lut noh ia ka tulop kaba la sah mynta la palat 30 bnai, bad ban wengnoh ia ka Secretary Executive ka Rise R Marak.
La ong ba kane ka jingiakhih kan bteng haduh ba kin da ioh ia kane ka jingdawa jong ki, na ka liang u Administrator jong ka GHADC u Dr Vijay Kumar u la kyntu ia ki nongtrei ba kin wan trei bad kan nym ktah ka jingtrei kam bad ia ka tulop yn sa pyrshang ban leh katba lah.
Na ka liang jong ki nongtrei ka GHADC kila dep ban ujor sha u Lat ka jylla bad kum juh sha ka ophis jong u myntri rangbah duh jong ka Ri India bad sha kiwei kiwei, halor ka jingtyrwa ban siew shibnai ka tulop kane kan nym lah ban iarap ia ki ban siew ia ka ram kaba kila shim.
Ka GHADC ka don haduh 1700 ngut ki nongtrei bad la ong ba ka jingmih tang na ka lat mih pisa kaba dei na ka GHADC ka long kumba T.7 klur ha ka shibnai katba ka jingsiew tulop na ka bynta ki nongtrei ha ka jingsiew kaba rim ka long tang T.3.5 klur lada shim ha ka tulop kaba thymmai kaba la pyntrei kam naduh u bnai Iaiong 2018 ha ka shibnai ka long T.5 klur.
La ong ba kane ka jingduh tulop jong ki nongtrei ka GHADC kala dei naduh ka Executive Committee kaba la ialam da ka seng Congress ha ka por jong ki san bnai bad ha ka Executive Committee kaba la ialam da ka NPP ka long 27 bnai bad ki nongtrei ka GHADC ki dawa ba ki dei ban ioh noh ia ka tulop ka jong ki.
