Shillong, Risaw 04: Ka Khasi Students’ Union (KSU) ka ba kynthup na duh ka KSU SouthWest Khasi Hills, KSU Sawsymper Circle, ka KSU Lawbah Border Area Circle bad ka KSU Balat Border Area Circle mynta ka sngi ka 4 tarik u Risaw 2024 kala pynlong ia ka jingiakhih da kaba iashong kyllain mungor ban pynbor ia ka Sorkar Jylla ba kan kyntiew kyrdan noh ia ka Mawsynram C&RD Block sha ka Civil Sub Division kaba pura.
Ha kane ka jingiashong kullain mungor la wan ban ia shimbynta da ki nongialm bad ki dkhot ka KSU ha ryngkat ka jingwan ai mynsiem na u MDC ka Mawsynram u Bah Alvinstone Sawkmie, u Ex MLA u bah Himalaya Muktan Shangpliang bad kiwei kiwei pat ki riew rangbah ka thain.
Ha ka jingiakren bad ki nongthoh khubor na ka liang u President ka KSU South West Khasi Hills samla Forwardman Nongrem ula ong ba ngi pynlong ia kane ka jingiashong kyllain mungor ban pyrshah ia ka jingsngap mynthi jong ka Sorkar ia ka jingdawa bala sahteng la slem bha jong ki paidbah ka Mawsynram ban kyntiew kyrdan ia ka Block sha ka Civil Sub Division.
Ula ong ba ka Seng kala iakynduh na ka por sha ka por ia ka Sorkar Jylla hynrei kam shym la don satia kano kano ka jingshimkhia ban pynurlong ia kane ka jingdawa kaba la iaid mynta la 24 snem kata naduh u snem 2000.
U bah Nongrem u la ong ruh ba ka Sorkar Jylla kala shu kular ia ki paidbah ka Mawsynram ban pynurlong ia kane ka jingdawa khlem da leh pat ia ka kam. Bad dei na kane ka daw ka ba pynlong ia ngi ban mih bad pynlong ia kane ka jingiakhh ha Shillong ban pynbor ia ka Sorkar ba kan mynjur noh ha kaban pynkha ia ka Civil Sub Division ha Mawsynram.
Ula ongruh ba ka Mawsynram Block kala dei ia kaban kyntiew kyrdan noh sha ka Civil Sub Division haba pynshong nongrim ia ka jingdon ki nongshongshnong. Kane ka Block ka dei kaba la pynkha la 62 snem mynshuwa.
Kat ba na ka liang u MDC ka thain u bah Alvin Sawkmie u la ong ba ha kine ki khyndiat snem ba la leit ki la ioh ban ia kynduh ia u Myntri rangbah ka Jylla ban pynsngew ia ki jingeh jong ka thain Mawsynram bad ka Civil sub Division ruh ka dei kawei ka mat.
U la ong ruh ba umtip na ka daw aiu ba ka sorkar Jylla ka ieh bein ia ka thain Mawsynram Constituency bad u tip shai ba kane ka dei ka political will jong ka sorkar ba kan ai ia ka Mawsynram da ka civil sub Division. U la ong ruh ba mynta la don kam ban iai ban pynkynmaw ia ka sorkar ia ka jingdon kam jong ngi kum ki paidbah.
