Shillong, Rymphang 15: U Dr Mukul Sangma nongialam ka liang pyrshah la ong ba ha kane ka dorbar mang tyngka kin sa rah hapoh ka iing dorbar ia ki mat ia kren kiba ktah ia ka jylla bad kiwei ki mat ia kren kiba la mang tyngka na ka bynta ki liang pyrshah bad hapoh ki kyndon bapher bapher katkum ki rule kiba don ha kaba ia dei bad ka jingpyniaid dorbar.
Haba ia dei bad ka jingjia hapoh ka party Congress u Dr Mukul la ong ba mynta ki long tang ki nongpeitkai na shabar kumba long lem kiwei ia kaei kaba jia hapoh jong ka party Congress bad ka dang long kaba kloi eh ban kren ei ei halor kane ka jingkylla ha ka sian pyrthei bad kaei ka ban jia ha kine ki bnai ban dang wan ym pat klah ban tip.
U Dr. Mukul la ong ba ka kam politic ka dei ka kam kaba eh tam, kumta hap ban sngewthuh bha bad ban pyniaid ia ka party kum ka seng congress ka dei ka kam kaba eh bha kutma don kam ban da sngewthuh bha ia ka jinglong jingman kumno ban kyntiew ia ka party ha ka synshar paidbah bad ryngkat ki jigneh kiba iatyngkhuh.
U Nongialam ka liang pyrshah na ka AITC u Dr Mukul Sangma u la ong ba kila shim ia ka rai ha dien ba kila ia pyrkhat janai bha bad khlem da jer kyrteng la ong ba kila shim ia ka rai leh se da ka jingpyrkhat sani ba kin nym don shuh ha kata ka kynhun.
