Shillong, Nailur 03: U myntri rangbah ka jylla Megh
alaya u Conrad K Sangma mynta ka sngi bad u myntri ka koit ka khiah jong ka sorkar jylla u Bah A L Hek ki la ia kynduh ia u myntri ka koit ka khiah jong ka sorkar pdeng u Jagat Prakash Nadda ha nongbah Delhi ban ia kren halor ki lad ki lynti kumno ban kyntiew ia ki lad ai jingsumar ha kane ka jylla Meghalaya.
Na ka liang jong u Myntri rangbahka jylla u la kam ba kane ka jingiakynduhka long kaba sei soh namar u myntri ka sorkar pdeng u la kular ban iarap ia ka sorkar jylla ban pynbha ia ka koit ka khiah ha kane ka jylla Meghalaya. Ha kane ka jingiakynduh la ia kren shibun ki kam kiba ia dei bad ki kam pynroi ha ka koit ka khiah.
Ha kane ka jingiakynduh na ka liang jong u myntri ka koit ka khiah jong ka sorkar jylla u la kren halor ka jingshna ia ki jaka ai jingsumar da ka jingiarap jong ka sorkar pdeng bad kane kala iarap ia ka sorkar jylla ha kaba pynpoi ia ki lad jingsumar ha ki bynta bapher bapher jong ka jylla.
U Bah Hek ha kane ka jingiakynduh u la pan ka jingiarap na ka sorkar pdeng ban tei ia ka jaka ai jingsumar ia kaba la tip kum ka Anti-Retroviral Therapy (ART) ha Jowai. U myntri ka sorkar pdeng u Nadda u la ai ka jingkular ba ka sorkar pdeng kan iarap na ka bynta kane khnang ba ka sorkar kan ai jingsumar ia kiba pang niangkulia ha Jowai.
Ha kane ka jingiakynduh u myntri rangbah ka jylla u la kren ruh ia ka jingai dawai ei jong ka sorkar sha ki paidbah, halor kane ka sorkar ka kwah ba ka sorkar pdeng kan iarap lem ia ka sorkar jylla ban thied ia ki dawai ban ia da ia ka jingim briew. Ha kane ka jingiakynduh la ia kren ruh ban kyntiew ia shibunki PHCs sha ka kyrdan CHCs, la ia kren ruh kumno ban pynheh ia ka Ganesh Das Hospital ban lah ban sumar ia kiba ioh ia ka jingpang bam pong.
Namar kan don ka National Games ha ka jylla ha u snem 2022 u myntri rangbah u la ia kren ruh ban buh ia ka jaka ai jingsumar ba kyrpang na ka bynta ki nongialehkai lada don kano kano ka jingmynsaw. Halor kane u myntri ka sorkar pdeng u la kular ban iarap. U myntri rangbah u la pynpaw ruh ia ka jingsngewnguh ba ka sorkar pdeng kala mang pisa T.189 klur ban tei ia ka jaka pule doktor ha Tura. U myntri rangbah u la kyntu ia ka sorkar pdeng ban pdiang ia ka jingpynkiew dor ha kaba tei ia kane ka jaka pule doktor sha ka T.244 klur ha Tura.
Ha kane ka jingiakynduh na ka liang jong u myntri rangbah u la ia kren bad u myntri ka sorkar pdeng halor ka jingbym trei kam jong ki mashin ha ki jaka ai jingsumar jong ka sorkar kiba don ha Meghalaya. Halor kane u myntri ka sorkar pdeng u la ai jingmut ba ka sorkar jylla ka dei ban pan noh da ka jingiarap na ka sorkar pdeng ia kaba la tip kum ka “Bio Medical Maintenance” da kaba ia soi ia ka MoU bad ki kompeni shimet ba kin maramot ia ki mashin bala siew bad ka sorkar pdeng kan bei ia ka pisa.
Ha kane ka jingiakynduh la ia kren ruh kumno ban kyntiew ia ka NEIGRIHMS Hospital kaba dei jong ka sorkar pdeng, ha kane ka jingiakren u myntri ka sorkar pdeng u la ong ba dang don kam ban leh bun kiei kiei ban pynbha ia kane ka hospital bad ia ki jingeh kiba dang sah khamtam eh ha kaba pyniaid iaka.
