Shillong, Nohprah 15: Mynta ka ngi ka sorkar kala khot ia ka jingiakynduhlang ia ki Chief Executive Member jong ki ar tylli ki District Council, ka KHADC bad JHADC, kum juh ia ki seng bhlang ha dien ba kala ioh ia ka kaiphot na ki Regional Committee ha kane ka jingpynkhreh ban ia pynbeit pud bad ka jylla, ia kane ka jingialang la pyniaid da u Myntri Rangbah ka jylla u Cornad K Sangma, ha ka jingdon lang u Symbut Myntri Rangah ka jylla u bah Preston Tynsong ba la long mynta ka sngi ka Secretariat Shillong.
Haba kren ha ki lat pathai khubor ha dien ka jingiakynduh lang ia ki CEM bad ki seng bhlang u bah Preston u la ong ba na ki 12 tylli ki jaka ba don ka jingiakajia pud bad ka Assam ka sorkar dang pynleit jingmut ha ki 6 tylli ki jaka bad ia kiwei ki hynreiw tylli ki jaka ba dang sah leh se yn sa shim khia ha u snem ban wan.
U Bah Preston la ong ba ha dien ba la lah ban pyndep ban ia pynbeit ia kine ki 6 tylli mynta, leh se yn sa shim sa ia kiwei ki 6 tylli kiba dang sah, ka Regional Committee kaba ia dei bad ka Jaintia Hills antad ba ha ka taiew ban wan kin ai ia ka kaiphot sha ka sorkar.
Kumba ka long mynta kane ka dei ka kaiphot kaba la ai sha u myntri rangbah ka jylla bad ki myntri rangbah ka jylla Meghalaya bad Assam kin sa ia kynduh ban ia kren ia mynta kim pat lah ban ong ei ei namar ka dang dei tang ka kaiphot. Ia ka jingiakynduh ki Myntri Rangbah jong ki ar tylli ki jylla ym pat lah ban ong lano kin ia kynduh.
Ha ba ia dei bad kane ka jingiapynkhreh ban ia kren kam pud, don kam ban peit katkum ki kot ki sla jong ki jaka kiba don kum juh ka history ia kaei kaba la ai ia ka kaiphot yn sa bishar bniah da ka sorkar bad ha dien ba la ia peit bniah kan sa don ka jingiakynduh ki myntri rangbah na kine ki ar jylla bad kin sa shim ia ka rai kaba khatduh.
Ha kane ka jingialang na KHADC la lam khmat da u CEM bah Titosstarwell Chyne bad na JHADC la lam khmat da u CEM u bah Thombor Shiwat, ki seng bhalang kiba la don lang ki long ka KSU, HNYF, HYC, ki party pat dei na ka BJP, HSPDP kila ia don lang ha kane ka sngi.
