Shillong, Jylliew 21: Ka Synjuk ki Rangbah Kur ka Bri-U Hynniewtrep mynta ka sngi kala leit ban ia kynduh ia u Chief Executive Member jong ka KHADC u Bah Teinwell Dkhar bad ia u nongialam ka liang pyrshah u Bah Lamphrang Blah ban kurpad ia ki ban pynlong ain noh ia ka KHADC(Clan Bill) 2018.
Ha kane ka jingiakynduh na ka liang jong u CEM jong ka KHADC, u Bah Dkhar u la pynsngew ha ka synjuk ba ka por kala dei ban ithuh noh da ka ain ia ki kur, la ong ba na ka liang jong kane ka EC kaba mynta kala shim khia ia kane ka bynta namar ka long kaba don kam haduh katta katta.
Ha kane ka jingiakynduh na ka liang jong u CEM u la pynsngew sha ka Synjuk ki Rangbah Kur ban ia trei lang na ka bynta ban pynlong ain ia kane ka Clam Bill, u la bethah ia ka synjuk ruh ba kin ai jingmut lem ha kaba ia dei bad kane ka kam kadei ka thymmai jong ka jaidbynriew.
Na ka liang jong u General Secretary jong ka synjuk u Bah Aristotle L Mawphlang, u la ai ia ka dorkhas jong ka synjuk bad la pynsngew ha u CEM ia ka jingdon kam ia kane ka Clan Bill kaba la pdiang da ka iing dorbar jong ka KHADC kaba khlem pat long ain, ha kane ka jingiakynduh la ia kren lang ruh ki dkhot jong ka synjuk.
Ha dien bala dep ban ia kynduh ia u CEM, na ka liang jong ka synjuk kala ia kynduh ruh ia u nongialam ka liang pyrshah u Bah Lamphrang Blah, ha kaba kila don lang ki para MDC, u Bah R V Lyngdoh, Bah Balajied Ranne, Bah Banjop Pyngrope, Bah Gabriel Wahlang bad u Bah Fantine Joseph Lakdong.
Ha kane ka jingiakynduh na ka liang jong u nongialam ka liang pyrshah u la pynpaw ia ka jingsngewdon kam ban don ia kane ka ain ban tehsong ia ki kur bad kum juh ki para MDC kiba don lang ha kane ka sngi kila pynpaw ia ka juh ka jingsngew ban ia treilang na ka bynta ban pynlong ain ia ka Clan Bill,2018.
