Shillong, Jylliew 28: u Bah A L Hek myntri ka sorkar jylla ba dei peit ia ki kam ri mrad ha ka jingleit jong u sha Delhi u la ia kynduh ia u myntri ba dei peit ia ki kam rep bad pynroi nongkyndong u Shivraj Singh Chouhan.
Kiwei ki myntri ka sorkar pdeng kaba u bah Hek u la ia kynduh ki long u Rajiv Ranjan Singh myntri ba dei peit ia kam ri mrad, ba de peit ia ka Panchayati Raj bad ri dohkha, la ia kynduh ruh ia u Kiren Rijijju myntri ba dei peit Parliamentary Affair bad ki rit paid.
Ha kane ka jingiakynduh na ka liang jong u bah AL Hek u la ia kren bad ki myntri ka sorkar pdeng ban pan ia ka jingkyrshan na ka sorkar pdeng ha kaba ia dei bad ka roi ka par jong ka jylla Meghalaya ha ba bun ki liang.
Kane ka jingleit ban ia kynduh ia ki myntri ka sorkar pdeng na ka liang jong u myntri ka BJP ba dei na kane ka jylla Meghalaya ka long ba kum ka party ka kwah ban iohi ba ka jylla Meghalaya kan kiew ha baroh ki liang ha ka roi ka por ka ioh ka kot.
