Shillong, Risaw 01: Halor ka jingpan jong ka sorkar jylla na ka KHADC ban ai ia ka “No Objection Certificate” ban shna ia ka surok na Wahkaji sha Ranikor kaba hap hapoh jong ka South West Khasi Hills District, u CEM jong ka KHADC u Bah HS Shylla u la lum ia ka jingialang jong ki MLA, ki MDC, ki Sengbhalang bad ki nongkit ka shnong na katei ka thain ban ia mir jingmut halor jong kane.
Haba kren ha ki nongthoh khubor ha dien ba la wai ka jingialang, u CEM jong ka KHADC u Bah HS Shylla u la ong ba ha dien ka jingiamir jingmut hapdeng kiba kwah ia ka surok bad kiba pyrshah ia ka surok, ka jingialang kala shim ia ka rai ba ia mynta “ Yn nym lah ban ai ia ka No Objection Certficate kat haduh ban da lah ban pynbeit”.
La iathuh ba na ka liang jong ka LYWA, ka KSU jong ka SWKH District bad ka West Khasi Hills District ki pyrshah bad ka HYC pat kala buh ia shibun ki jingkylli bad ha ka juh ka por ka HYC kala ong ba ka jingioh ia ka “ jingbit na ka tnad pynneh mariang ka sorkar bad ia ka jaka ka dei kam thok”.
Haba ia dei bad kane ka jingpan NOC, lada ka sorkar pdeng kam ai da ka jingthoh kaba thikna halor kane ka surok ia mynta kin nym lah ban ai ia ka NOC. Ka sorkar pdeng ka dei ban sngewthuh ia kane bad ka sorkar jylla ka dei ban shimkhia namar ka dei ka mat kaba khia haduh katta katta.
U CEM jong ka KHADC u la iathuh ruh ba ki MLA, ki MDC, ki seng bhalang bad ki nongialam ka tei ka thain kin sa ia kynduh para maki ba kin ia kren ia kane ka kam bad ha dien ba kila dep ban ia kren kin sa wan biang sha KHADC ai ka rai ka jong ki halor kane kane ka jingpan NOC jong ka sorkar.
Ha kane ka jingialang nalor u CEM, na ka liang jong ka KHADC la don lang u Bah Latiplang Kharkongor EM ba dei peit ia ka khyndew, u Bah Donkupar Sumer EM. Katba ki MLA bad ki MDC katei kathian kiba la ia wan ki long u Bah Gigur Myrthong, Bah Maxmilan Byrsat, u Bah Pius Marwein, ki MDC ki long u Bah Manstudy Nongrem, Bah LG Nongsiej. U Bah Kimfa Marbaniang u ba dei u MLA bad MDC.
