Mawkyrwat, Lber 28: Ka KSU South West Khasi Hills District lyngba ka kyrwoh ba la phah da u samla Forwardman Nongrem President ka ai ka jingpynbna ba na ka liang jongka seng ngin ai ka jingiatreilang ba pura bad ka tnad ka Koit ka khiah jongka District bad ka jylla halor ka jingiakhun pyrshah ia u corona virus.
Ka seng ka ai jingkyrshan ba pura iaki bor sorkar bad iaki bor District jongka South West Khasi Hills District hi baroh kawei. Ka pyrthei baroh kawei ka mad ia kane ka jingeh bad kumjuh ruh ka Jaitbynriew, kaba kongsan namar kata ka long ba uwei pa uwei u nongshnongshnong u dei ban long shlur bad ban nym kulmar jingmut namar ka jingkulmar jingmut palat kan wanrah jingeh kylla ialade bad iaka dong ka thain hadien ha bud.
Ka seng ka kyntu iaki paitbah ne ki samla pule ba don have kiwei ki jaka ba lada dang don lad sngewbha wat nym tieng ban sah shwa haki jaka ba phi don khnang ba kan nym don Kano Kano ka jingjia ba sngewsih iaphi ne iaka imlang sahlang.
Hynrei na bynta kito kiba Shem jingeh palat bad ki bymlah ban thawlad shuh da kumwei pat ki dei ban phone sha Ki Helpline Numbers jongki bor pyniaid district bad naka liang jongngi ruh ngin pyrshang ban iakren pynbeit bad ki bor District halor Kata ka bynta.
Shuhshuh, ka seng ka khot ka wer iaki paitbah nongshnongshnong ban ia peit lem iwei ia iwei bad iarap markylliang lada kino kino ki longing ki mad jingeh khamtam ki longing kiba duk ” Ngim dei ban pyniap noh iaka mynsiem tipbriew tipblei ne tip iaka hok Longbriew manbriew ha kaba kum kane ka por hynrei lyngba ka jingiatylli Lang kawei ngi kyrmen ba kaba bha kan bud nadien jongngi “.
Ka seng ka ai ruh ka jingsngewnguh bad ka phah iaka kyrwoh Kitbok kitrwiang sha baroh ki briew kiba trei haka tnad ka koit ka khiah naduh ki doctor, nurse bad kiwei kiwei ba kin long kiba shait kiba khlain bad ngi don ka jingkyrmen ba lyngba ka jingaiti lut jongki bad ka mynsiem ban tur iaki jingeh ka pateng ban wan kan iai sah Kynmaw iaki dienjat jongphi.
Kyntang iawai ka seng sa shisien pat ka kyntu iaki paitbah bad ki paradoh parasnam ba Kim dei ban kulmar jingmut ne panic hynrei ki dei ban long kiba adkar, ban da sumar ialade bad ban kohnguh ruh iaki jingbthah na ki bor pyniaid jongka tnad ka koit ka khiah khnang ba ngin lah ban ialeh ia une u khniang jingpang. ka jaitbynriew jongngi la ju tip kum ka jaitbynriew ba ieit kyrpang u blei, ngin long shitylli khlem ka jingtieng bad kyrmen ngin sa lait na kine ki jingeh.
