Shillong, Risaw 13: Ka Synjuk ki Seng Rangbah Katholik Zone II myn ha ka 12 bad 13 tarik u bnai Risaw ka la pynlong ia ka lympung dorbar kaba 8 ia kaba la pynlong ha iing Mane U Petrus bad Paulus Bakhuid Shnat Niam Pynthorumkhrah.
Katei ka lympung kaba phra jong ka Zone II kaba kynthup ia ki Khyndai tylli ki Shnat Niam kiba kynthup ka Pynthorumkhrah, Mawpat Nongmensong, Mawpdang, Umpling, Nongthymmai, Laitumkhrah, Madanryting bad Nongrah.
Ka mat jong ka jingiakynduh lang jong ki rangbah ka long ” Ko Kynrad to hikai iangi ban duwai kumba u Ioannis u la hikai ia ki synran” ia kaba la sot na ka Kospel u Lukas lynnong ba 1 dkhot ba 1.
Kum u Rangbah uba don ka jingkhlieh ia ka Iing ka sem bad ka Balang la iathir ia ka juk nongialam mynta bad ki jingjyllei ki jingdih Drok ki Khun samla.
Na ka liang ka Synjuk ki Seng Rangbah Katholik Zone II bad ka Seng Rangbah Shnat Niam Pynthorumkhrah ki la pynlong ka jingialang kaba jop ha ka jingialam u Lyngdoh Nongsharai Rangbah u Sohblei Laurence Nongkseh bad u Sohblei Pascal Lyngdoh u Spiritual Director ka Zone ki la long ki nongai jingmut ia katei ka Dorbar jong ki.
Shuh shuh ia katei ka Dorbar ki rangbah la wan plie pyrda da u Vicar General ka Jylla Niam Bah Shillong u Sohblei Richard M. Majaw da kaba kyntiew ia ka lama jong ka Zone bad ka jingpyllait paidbah ia ka jingrwai theme song kaba ai kyrteng ” Rah sha U Trai la ki kti Ban iaroh da ki jingduwai ” ba la rwai da ki rangbah ka Pynthorumkhrah.
Ha ka Sngi u Blei ka 13 tarik u Archbishop Victor Lyngdoh DD u la long u kongsan ban pynmynta ia ka Mass bakhuid bad ki Lyngdoh Sohblei jong ki 9 tylli ki shnat niam.
Ha lympung ba 8 jong ki rangbah u Archbishop Victor Lyngdoh u la ai ka sneng ka kraw sha ki rangbah ki 9 tylli ku Shnat Niam Zone II ba ki dei ban pule bad tip ia ki lai tylli ki jingmut u Alphabet WWW Kaba mut Wisdom, Worship bad Work.
Lada ki rangbah ki tip ia ki lai tylli ki W ka mut ki la dei ki rangbah kiba kit ia ka Imlang ka sahlang bad ka Iing ka sem. Hadien ka Mass Bakhuid u Archbishop Victor Lyngdoh u la pynlait ia ka kot kaba la thoh da u Sohblei Barnes Mawrie u Phadar Synrop ka Mawpdang Shnat Niam.
Katei ka lympung ba la pynlong ka la don ka jingiamir jingmut ba ki rangbah ki dei ban long kiba kitkhlieh ban long ki nongialam bad la pynbyrngia ia ki rangbah da ki jingrwai bad ki skit lyngkot.
La pynkut ia ka lympung Dorbar kaba 8 da ka jingpynhiar ia ka lama da u Sohblei Ruben Lyngdoh bad ka jingaiti ia ka Lama jong ka Zone sha ka Shnat Niam Mawpat na ka bynta ka lympung Dorbar kaba 9 ha u snem 2025
