Shillong, Risaw 10: Mynta ka sngi u myntri rangbah ka jylla u Conrad K Sangma mynta ka sngi u la leit ban jngoh ia ka shnong Purakhasia bad ia ki shnong ba marjan kiba la shah ktah ha ka jingshlei um ha kine ki sngi ba la dep.
Ha kane ka jingleit u myntri rangbah ka jylla u la pynlong ia ka jingialang bad ki ophisar jong ka Purakhasia Block ha ophis treikam ha Puran Bazar, u myntri rangbah u la ia kynduh ia ki paidbah bad u la ai ka jingkular ba ka sorkar lyngba ki bor district kan iarap.
Ha kane ka jingiakynduh bad ki paidbah u myntri rangbah ka jylla u la ong ba ka jingshah pynjot kam dei tang ia ki iing ki sem, hynrei ki pukri um, ki jaka rep kila shah pynjulor, la btah ia ka tnad rep bad ka tnad rep soh kin shim ia ka jingkhien ia kiba la shah ktah.
Ha kane ka jingleit u la leit ban jurip ruh ia ka tyllong um jong ka wah Purakhasia, la leit ban jurip ia ka jingkieng kaba don ha ka wah Grim kaba pyniasoh ia ka Wagigitok kaba pyniasoh bad ka Akimpara, la leit ban jurip ruh ia ka jingkieng ha ka wah Thallang ha Angalangre bad jingkieng kaba la khyllem ha Rimrangpara jong ka wah Norang.
U myntri rangbah ka jylla ula ia kynduh ruh ia ki paidbah ha ka shnong Posenggagre ia ka jngialang la pynlong ha Aikinpara, ha kane ka jingialang ki la pynpaw ia ki jingeh kaba ki don ha khmat jong u myntri rangbah ka jylla.
