Shillong, Nailar 22: Mynta ka sngi ki seng bhalang na Garo Hills bad kiba khappud na Assam mynta ka sngi kila pynlong ia ka jingiakhih shong kyllain mungor kaba shi sngi ha jan Civil Hospital Shillong ban dawa na kane ka sorkar Meghalaya ba pynkylla noh ia ka sos kular kaba la ia soi ha pdeng ka Meghalaya bad Assam.
Ki kynhun seng bhalang kiba la wan sha Shillong ban ia shim bynta ha kane ka jingiakhih kaba shisngi, ki long ka GSU, FKJGP, ADE, AYWO bad ka NGCO bad kiwei kiwei de ki seng kiba na Assam kiba don ha khappud bad ka jylla Meghalaya.
Ha kane ka sngi la phah ruh ia ka dorkhas sha u mytnri rangbah ka jylla ban dawa na u ba dei ban pynkylla biang ia ka sos kular kaba la ia soi bad ka sorkar Assam ha kaba ia dei bad ka jingiapynbeit pud pynbeit sam ha pdeng kine ki ar tylli ki jylla.
Ha ka dorkhas kaba la phah sha u mytnri rangbah mynta ka sngi la kdew ba kila dep ban phah ia ka jingthoh sha u mytnri kam poh iing ka sorkar pdeng u Amit Shah hynrei kaba sngewsih ka long ba haduh mynta kim pat ioh ia ka jubab halor kane.
Ha kane ka dorkhas kila dawa ba ka sorkar ka dei ban pynmih paidbah ia kaiphot ha kaba la aiti da ka Regional Committee sha ka sorkar nakar kala don ka jingkynnoh ba ia ka kaiphot ym shym la pyntip paidbah,namar kaei kaba ki tip kam shym don kata ka jingpan jingmut na ka KHADC lane ki Hima.
Haba ia dei bad ka jingialang paidbah kaba la khot da ka ophis jong u Deputy Commissioner jong ka West Khasi Hills kila don ki shnong kum ka Bolsum, Balsrik, Watre Rong-Chong, ki kwah ban don ha Meghalaya, hynrei ia kine ki shnogn ym shym la kynthup ha Meghalaya.
Ki paidbah kane ka jylla Meghalaya kiba hap ha khappud bad ka Assam ki ia kynduh shibun ki jingeh bad la iohi ba bun ki jingeh kiba la ia kynduh da ki paidbah bad bun sien kila mih ki jingiakynad bad ki pulit jong ka jylla Assam ruh.
La ong ba ki don ki shnong kiba la pynhap sha Assam bad ki kyrmen ba u myntri rangbah ka jylla mynta un leh ia kano kano ka kam da ka jingsgnewthuh, ia ka dorkhas la soi da u Pritam Areng, Matsrang Sangma na ka FKJGP, Dalseng Bira Ch Monin, u Supam R Marak ka ADE, Sengbath Ch Marak, Silkam Ch Marak na ka AYWO bad kiwei kwei dei ki nongialam seng.
