Shillong, Nailar 25: Ka Myntri Khynnah jong ka Sorkar Pdeng ba dei khmih ia ka Tnat ka koit ka khiah, ka Dr Bharati Pravin Pawar mynta ka sngi ka la leitjngoh ia ka East Jaintia Hills District, Khliehriat, Meghalaya ban peit bniah ia ka jingiaid shaphrang ka jingpyntreikam ia ki skhim bapher bapher jong ka sorkarpdeng.
Ka Myntri ka la ong ba ki skhim ki la treikam bha ha Meghalaya. Ka la ong ba ki don katto katne ki skhim ba la treikam bha, kum ka MGNREGA ha kaba ka jingjop kalong 99 percent.
“Ha u snem ba ladep, ngi la iohpdiang ia ka mang tyngka kaba 33 klur na ka bynta ka MGNREGA, kaba la iarap ia palat 25,000 tylli ki long iing. Mynta u snem, ngi la ai ka mang tyngka katkum ka jingkiew ka jingdawa.” Ka la bynrap ba ka MGNREGA ka la long kaba jop ha East Jaintia Hills District. Ka Myntri ka la iaroh ruh ia ki sienjam jong ka Tnat.
Haba kren shaphang ka PM AwasYojana, kaba thmu ban pynbiang iing sah ia ki briew ba duk ba suk, ka Myntri ka la ong ba la sanction ia ka mang tyngka kaba kynthup 882 tylli ki longiing. Ka Dr Pawar ka la pyntip ba ki la don ki sienjam ban mangpisa shuh shuh na ka bynta ki iing kiba paka.
Ka la kren ruh shaphang ka National Rural Livelihood Mission (NRLM), kaba ai jingkyrshan ia ki briew lyngba ki Self Help Group (SHG). Da kaba ban ba ki SHG kilong ka sienjam ba biang jong ka sorkar, ka Dr Pawar ka la ong ba la ithuh ia ki khynnah kiba duna ka bam kaba tei lyngba ki SHG na ka bynta ka jingeksamin ia ka koit ka khiah da ka Tnat ka koit ka khiah ha ki jaka nongkyndong.
Ka Dr Pawar ka la ong shuh shuh ba ka Public Works Department (PWD ka la mang 126 klur ha u snem ba ladep ban shna ia ka surok kaba 39 km ban pyniasoh ia phra tylli ki shnong. Kane ka surok kan long ka jingmyntoi ia ki nongshong shnong ba sah ha ka thain Khappud India bad Bangladesh bad la buh thong ban pyndep hapoh ka shi snem shiteng ban wan, la bynrap ka Myntri.
Ha kaba iadei bad ki Primary Health Care (PHC) centre, ka Myntri ka la ong ba ka jingmang pisa ka la kiew na ka T. 1,80,0000 ha u 2022 sha ka T. 2,60,0000 mynta u snem. Ka la batai ba ka sorkarpdeng ka la mangpisa 1,23,0000 bad 2,20,0000 na ka bynta ban pynkhlain ia ki PHC sub-centre bad ki diagnostic lab.
“Ka PradhanMantriArogyaYojana, ka skhim insurance kaba heh tam, ka ai haduh san lak na ka bynta ka jingai jingsumar ia ka longiing. Haduh mynta, ki don 17,000 ngut ki briew kiba la ioh jingmyntoi haba ki hap ioh jingsumar kyrkieh bad ki donkam ban shah puid ha kaba ki jingmyntoi ki la kot sha palat 10 klur,” la pyntip ka Dr Pawar.
Ka la kren ruh shaphang ki sienjam jong ka sorkarpdeng ban pynduhjaitia ka jingpang tuberculosis ha ki PHC bad ki Health and Wellness Centre (HWC). “Ngi la ai jingsumar ei ha iing lyngba ki PHC. Lyngba ki HWC, ka jing thmu jong ngi kalong ban leh screening ia ka jingpang breast cancer, cervical cancer, hypertension, jingpang shini bad kiwei kiwei,” ka la ong.
Ka Myntri ka la ai khubleiia ki bor pyniaid jong ka jylla kiba la pynkot haduh 88 per cent ka jingioh jingkoit ha ki jaka sumar. “Ha u snem ba ladep, ka jingioh jingkoit ha ki jaka sumar ka long 54 per cent, bad ka la kiew sha ka 76 percent. Mynta u snem, kalong kumba 88 per cent.
Ka thmu ban pynbiang ki lad ioh jingsumar ha kine ki jaka bad ruh ba ngin pynbiang ka jingshakri ia kito kiba kham don ha ka jingma. Ha kaba iadei bad ka HIV, ka thong jong ngi kalong ban pynbiang ki dawai, ai ka jingiasyllok, ki jaka test bad kiwei kiwei lyngba ki ART centre.
Ka la pyntip ruh ba ka KrishiSanchayiYojana ka pynbiang lai klur sha 180 tylli ki longiing. “Ka “PM KisanSammanYojana ka la iarap ia 10,000 ngut ki nongrep, da kaba thep T. 6,000 beitbeit sha ki bank account jong ki,” ka la bynrap bad kren shaphang ka JalJeewan Mission.
“Ngi la kynthup kumba 192 tylli ki shnong. Na kane, 42 tylli ki shnong ki dei kiba la dep ia ka kam. Ngi la pynbiang 186 klur ban pynpoi ia ka um ba khuid sha ki briew ka Meghalaya. Kumjuh ruh, ka sorkarpdeng ka la ai palat hynniew klur ban kyrshan ia ki kam ri dohkha ha Meghalaya.
