New Delhi, Naitung 31: U Myntri Rangbah duh ka ri, u Narendra Modi mynta ka sngi u la iaroh ia ki sienjam jong ka Meghalaya ban rakhe ia ka Azadi Ka Amrit Mahotsav bad u la kynmaw ia ka jingshlur jong u shipai ba shlur jong ka Jylla, u Tirot Sing ha ka bynta ba 91 jong ka Mann Ki Baat.
U la pynpaw ka jingkmen ia ka rukom ba ka Amrit Mahotsav ka la long ka jingiakhih paidbah ha kylleng ka ri. Ha ka jingiaroh ia ki nongshong shnong kiba la pdiang ia ka Mahotsav ban kynmaw burom ia ka jingdap 75 snem ka jingioh jinglaitluid jong ka ri.
“Kawei na kum kane ka jingjia ka la jia ha Meghalaya mynta u bnai. Ki briew ki la kynmaw ia u shipai ba shlur jong ka Meghalaya, u Tirot Sing ha ka lyngkhuh sngi iap jong u. U Tirot Singh u la ieng skhem ban pyrshah ia ka jingiasylla ki sahep Bilat ban pyniaid ia ka rilum ka Khasi bad pynduh ia ka kolshor jong kane ka thain”. La ong u myntri rangbah duh jong ka Ri u Narendra Modi.
Bun ki riewdonsap ki la pyni ia la ki jong ki sap ha kane ka prokram. Ki la pynkhie im biang ia ka histori. La pynlong ruh ia ka tamasa kum shi bynta kane ka prokram, ha kaba la pyni ia ka kolshor ba khraw jong ka Meghalaya ha ka rukom kaba itynnad.
U Myntri Rangbah Duh u la pyndon burom ia u Shaheed Udham Singh bad baroh kiwei ki riewshlur kiba la aiti lut na ka bynta ka ri. “Paralok, ha ka 31 tarik Naitung kaba long mynta ka sngi, baroh ma ngi ki nongshong shnong ngi ai khublei ia ka jinglenlade u Shaheed Udham Singh ji,” u la ong.
Ka bynta kaba mynta ka sngi jong kane ka prokram kalong halor ka jingioh jinglaitluid ka ri. U la ong, “Baroh ngin sa sakhi ia ka khyllipmat kaba khraw bad kaba kyrpang, lada lah kha ia ngi ha ka por jong ka jinglong mraw, kumno ngin lah ban mutdur ia kane ka sngi? Ka jingthrang ia ka jinglaitluid na ka jinglong mraw, ka jingkhuslai ia ka jingioh jinglaitluid na ki kynjri jong ka jingshah teh mraw- katno kalong kaba eh! Kito ki sngi, kawei pa kawei ka sngi, ngin iohi da ki million ki briew jong ka ri ki iakhun, ki aiti ia lade na ka bynta ka jinglaitluid.”
Ka bynta kaba 91 jong ka Mann Ki Baat la pyni ha ki sngi shuwa ka Sngi ioh jinglaitluid. “Mynta ka kynti ka ‘Mann Ki Baat’ kalong kaba kham kyrpang. Ka daw na ka bynta kane mynta ka kynti kadei ka Sngi ioh Jinglaitluid ka ri, haba ka India kan dap 75 snem ka jingioh jinglaitluid jong ka,” la ong u Myntri Rangbah Duh.
