New Delhi, Naiwieng 02: Ka kynhun na India ba ialam da u Principal Secretary sha u Myntri Rangbah Duh, Dr. PK Mishra, ka la iashim bynta ha ka jingialang ki Myntri G-20 Disaster Risk Reduction Working Group (DRRWG) naduh ka 30 tarik u Risaw haduh 1 tarik u Naiwieng kaba la long ha Belem, Brazil.
Lyngba ka jingiashim bynta kane ka kynhun jong ka India, ka la wan ka jingiahap jingmut halor ka declaration ba nyngkong jong ki Myntri halor ka Disaster Risk Reduction (DRR).
Ha ki jingai jingkren jong u ha ki bynta bapher bapher, uDr. PK Mishra u la kren shaphang ka jingiaid shaphrang ka Sorkar India ha ka jingpyndunaia ki jingma na ki jinglynshop ka mariang bad ka jingkyntiew ia ka jingbei tyngka na ka bynta ki jinglynshopki bor ka mariang ha India.
U Dr. PK Mishra u la ban jur halor ka rukom treikam ka India ha ka disaster risk reduction (DRR), ha ki san tylli ki kam ba kongsan jong ka DRRWG, ia kiba la batai ha ka por jong ka jinglong President ka India ia ka G20 kiba long, ki lad ioh jingtip lypa, ki jingdon jingem kiba lah ban iaineh na ki jinglynshop ka mariang.
Ka jingbei tyngka na ka bynta ki jinglynshop ka mariang, ki lad khyllie im biang kiba khlain bad ki jingpynbeit kiba don nongrim ha ka mariang. Ha kaba iadei bad ki jingdon jingem kiba lah ban ianeh na ka jinglynshop ka mariang, u la kren shaphang ka sienjam jong u Myntri Rangbah Duh ha kylleng ka pyrthei na ka bynta ka Coalition for Disaster Resilience Infrastructure (CDRI), kaba don mynta 40 tylli ki ri bad 7 tylli ki kynhun jong ki ri kum ki dkhot.
U Principal Secretary sha u Myntri Rangbah Duh u la ban biang halor ka jingkut jingmut ka India na ka bynta ka Sendai Framework bad u la kyntu ban don ka jingiatreilang kaba kham khlain shuh shuh hapdeng ki ri na ka bynta ka jingiasam ia ki jingnang jingstad, ka jingai ia ka teknoloji, bad ka roi ka par kaba iaineh ban kyntiew ia ka jinglahiaineh na ki jinglynshopki bor ka mariang ha kylleng ka pyrthei.
Ka kynhun na India ka la iashim bynta ruh ha ka jingialang Troika bad ki Myntri na Brazil bad South Africa, bad ki la don ka jingialang bad ki Myntri na Brazil bad kiwei kiwei ki ri kum ka Japan, Norway, South Africa, South Korea, Germany, bad ki khliehduh jong ki kynhun jong ki ri.
Ha kaba iadei bad ka jingkyntu jong ka UNSG halor ka Jingkiew Palat ka Jingshit, u Principal Secretary sha u Myntri Rangbah Duh u la kren shaphang ki jingshem bad ki sienjam ba la shim ba kynthup ka jingpeit bniah ia ka jingkyntiew ia ki rukom tynrai kiba iahap bad ki jinglong jingman ha ki jaka.
Ka DRR WG kaba nyngkong ka la wan lyngba ka sienjam jong ka India ha ka por ba ka long President jong ka G20 ha u 2023. U Dr Mishra u la kitbokkitrwiang ia ka Presidency jong ka Brazil ba kan bteng ia ka DRRWG, bad ka jingpyniar ia ka sha ka jingiakynduh ki Myntri bad u la ong ba ka India ka kyrshan ia ka South Africa halor ka DRRWG na ka bynta ka G20 Presidency jong ka, ka ban wan ha une u snem ban wan.
Ka jingiashim bynta ka India ka pyni ia ka jingkiew ka kyrdan jong ka ha ki kam DRR ha ka pyrthei bad ka jingkut jingmut jong ka ban tei ia ka pyrthei kaba kham shngain bad kaba kham iainehna ki jinglynshop ki bor ka mariang.
