Shillong, Naiwieng 28: Ka Tnad Pule puthi ka Jylla mynta ka sngi ka 28 tarik u Naiwieng 2024 kala iasoi ia ka Memorandum of Understanding (MoU) bad ka National Stock Exchange (NSE) ban ai jinghikai ia ki samla pule College ka Jylla halor ka Banking, Insurance bad kiwei kiwei.
Ia kane ka MoU la iasoi ha ka jingiadon ryngkat u Myntri Rangbah ka Jylla Conrad K Sangma, u Myntri ka Tnad Pule Puthi Rakkam A Sangma, u Chief Secretary ka Jylla Bah DP Wahlang bad ki Ophisar na ka Tnad Pule Puthi bad ka NSE.
Haba ai jingkren ha kane ka jingialang, u Myntri Rangbah ka Jylla Conrad K. Sangma u la ban jur ia ka jingdonkam jong ka jinghikai ha ka liang ka pisa tyngka, khamtam ha kane ka juk kaba la nang kiew stet bha ha ka liang ka ioh ka kot.
“Ki samla bad ki nongseng kam seng jam jong ngi bunsien ki duna ïa ka jingnang jingstad ha ka liang ka pisa kaba donkam ban ïaid lyngba ki jinglong jingman kiba jylliew ha ka liang ka ioh ka kot. Kane ka jingiatreilang bad ka NSE kan ai bor ia ki ban shim ia ki rai kiba biang ha ka liang ka pisa tyngka, ban kiar na ki jingma ki bym donkam, bad ban tei ia ka lawei kaba shngain”, u la ong.
La khmih lynti ba ka prokram kan ktah ia ki bynta ba kongsan jong ka jingtlum pisa, kynthup ia ka jingbuh pisa, ki jingbei tyngka, ka jingpyniaid ia ka ram, bad ka jingpeit bniah ia ki jingma. Da kaba pynïasoh ïa kine ki sobjek ha ka jinghikai ha ki kolej, ka sorkar ka thmu ban pynroi ïa kajingnang jingstad ha ka liang ka pisa tyngka kaba lah ban kyntiew ia ka roi kapar jong ka Meghalaya.
U myntri ka tnad pule puthi u Rakkam A. Sangma u la iaroh ia kane ka jingthmu kum ka sienjam kaba pynkylla sha ka pule puthi kaba pura. “Kane ka MoU kam dei tang ka jinghikai nombar; ka dei shaphang ka jingpynwan dur ia ki nongshong shnong kiba don ka jingkitkhlieh kiba lah ban noh synniang kaba don jingmut sha ka imlang sahlang. Ka jingnang jingstad ha ka liang ka pisa tyngka kan plie lad ïa ki kam seng kam seng jam bad kan kyntiew ïa ka jinglah ban ïoh kam,” u la kynthoh.
